Tek opp att tråden til strikkefestival

– Det er eigentleg litt feil å kalla det strikkefestival, for det handlar absolutt om meir enn berre strikking. Det er i grunn meir ein handarbeidsfestival, for me ynskjer å visa fram det som folk driv med av ulike typar handarbeid, fortel Gerd-Laura Bondhus.

– Planen var eigentleg at «Strikk på dalen» skulle arrangerast kvart år eller annakvart år, men grunna korona vart jo alt sett på vent. Me har snakka om dette ei god stund, og no blir det noko av, legg ho til.

Lokale produsentar

Bondhus fortel vidare at av ting ein kan få med seg blir det blant anna både veving, plantefarging og nålefilting.

– I tillegg til dette kjem det også ei dame frå Bergensområdet som skal ta oss med gjennom heile prosessen med karing og spinning, samt at det også blir det litt kultur- og handarbeidshistorie gjennom gamle mønster og bøker. Det kjem også ein del lokale produsentar, seier Bondhus.

Bygdekvinnelaget er glade for å kunne løfta fram dei lokale produsentane og aktørane som stiller med alt i frå alpakka- og kasjmirull til strikkemaskiner og strikkebøker frå Norli Husnes.

– Eg tykkjer det er så kjekt at folk driv med ulike ting, og at dei viser glede i det. Så kan me også løfta kvarandre litt fram og gleda oss over kvarandre sitt arbeid. Eg trur dette blir veldig kjekt, i tillegg blir det sjølvsagt også både god mat og gode kaker, avsluttar Bondhus.