Teikna ny avtale med Visit Hardangerfjord AS

I slutten av oktober hadde Kommunestyret oppe ei sak om å kvitta seg med medlemsskap og eigarskap i ein del selskap. Mellom anna vart det opna for å redusera engasjementet i Visit Hardangerfjord AS. Ordføraren og Høgre-gruppa gjekk inn for å sjå på dette, men Knut Johannes Helvik braut ut, og saman med Ap, Sp, Frp, SV og Venstre sikra han 18-17 fleirtal for å fortsetja som før.

Éi røyst avgjorde medlemskap

Den 5. desember kom så saka om regional reiselivsstrategi og ny samarbeidsavtale med Visit Hardangerfjord opp i Formannskapet. Visit Hardangerfjord starta i 2020 eit forprosjekt for ein reiselivsstrategi som skulle inkludera heile regionen, med kommunane Eidfjord, Ulvik, Ullensvang, Kvam og Kvinnherad. Forprosjektet vart fullført sommaren 2022, men det er eit ynske å vidareføra arbeidet.

«Relevante problemstillingar for hovudstrategien vil vera korleis regionen skal skapa auka lokal verdiskaping, nye stabile heilårsarbeidsplassar, auka opphald og lågare utslepp per gjest, og vidare korleis ein kan leggja til rette for investeringar i berekraftige løysingar innan reiselivsnæringa og samtidig styrkja økonomien i bransjen», stod det i sakspapira.

Fungerer godt

Eksisterande samarbeidsavtale med Visit Hardangerfjord går ut 31. desember 2024. Den nye avtalen gjeld for fire år.

«Vår vurdering er at samarbeidet med Visit Hardangerfjord fungerer godt, og at vi har god rekkevidde via deira flater», heitte det.

Til den regionale reiselivsstrategien vart Kvinnherad kommune bedt om å stilla med 100.000 kroner. Eidfjord, Kvam og Ulvik skal betala det doble, medan Ullensvang bidreg med 300.000. Årleg tilskot som følgje av samarbeidsavtalen er på 660.618 kroner.

– Dette er ei veldig god sak. Ei god sak for Kvinnherad kommune og for reiselivet. Hardanger og Hardangerfjorden er eit av dei sterkaste merkenamna i Norge og Nord-Europa. Å knyta Kvinnherad opp mot Hardanger vil styrka oss på alle måtar. Dette viser at vi vil vera med både innover og utover, og den store styrken til Kvinnherad er at vi har éin fot i Sunnhordland og éin i Hardanger, vurderte Per Harald Havnen Löfgren Johansen (Ap).

Får godt igjen

Ove Lemicka (Frp) var heilt samd.

– Eg er heilt sikker på at Kvinnherad kommune og bedriftene våre får godt igjen for investeringa på 100.000 kroner og det årlege tilskotet på 600.000 kroner, sa han.

– Det kostar litt, men eg trur det er lurt og ei god investering. Det er viktig at Kvinnherad får ein del av dette, og at det ikkje berre er indre Hardanger som er med i brosjyrar og slike ting, følgde Alf Jarle Langeland (KrF) opp.

Formannskapet gjekk samrøystes inn for innstillinga.