Tar med seg skuleelevar på scena i finalen
Me slår av ein prat med Mauricio Weimar før finalen i Norske Talenter. Han har store nyhende å dela.
– No driv eg og pakkar til turen. Eg skal jo ha med dei vanlege instrumenta mine, men eg skal òg ha med fjorten marimbaer!
Det er nemleg ikkje berre Mauricio som skal pryda scena i finalen på Norske Talenter. Med på laget har han ni elevar frå Hatlestrand skule, som skal spela marimba i lag med han.
Annonse
Vil gje noko tilbake til Kvinnherad
– Dei er ein kjempegod gjeng! Eg er så glad for at både skulen og foreldre er positive til dette. Produksjonsapparatet i Norske Talenter har også stilt seg positive, så då får me det til.
Mauricio seier elevane er godt førebudde, dei måtte berre øva inn ei omarrangering av eit stykke dei alt kan godt. For han er dette den beste måten å avslutta Norske Talenter på.
– Det var viktig for meg å gje noko tilbake til Kvinnherad. Eg har hatt prosjekt med elevar ved Hatlestrand skule i tre år, og no har eg også fått fast stilling der, og trivest så godt!
Annonse
Onsdag reiser Mauricio austover, og det er ein stor bil som må til for å frakta alle instrumenta. Så kjem det ein flott delegasjon til Oslo frå Hatlestrand skule på torsdag..
– Det er ein stor gjeng som reiser, med både foreldre og rektor og ungane. Fredag blir det førebuingar på scena på dagtid, og så er det finale, fortel Mauricio.
Gåsehud!
Rektor Lilli Britt Urheim er oppglødd over at elevane skal få denne opplevinga.
– Ja, kva skal eg seia? Gåsehud!, utbryt ho.
Urheim har lenge sett Mauricio i aksjon på Hatlestrand skule, og har berre gode skussmål å koma med.
Annonse
– Han er ein enormt flink musikkpedagog! Gjennom marimbaprosjektet får elevane ikkje berre musikalske ferdigheiter, dei får også trena på å konsentrera seg over tid, og å lytta. Ikkje minst har elevane veldig glede av spelinga, kan ho fortelja.
Det er elevane som gjekk 5.-7. steg i fjor som reiser, for dei har spelt marimba lengst. I tillegg er det med ei jente frå niande klasse som speler marimba på fritida. Urheim fortel at Mauricio eigentleg ville ha med seg fleire elevar, men at Norske Talenter sette eit tak på ni.
– Eg synest berre dette er fantastisk kjekt, og håpar alle held seg friske fram til finalen, seier rektoren.
For Mauricio er målet for fredag klart:
– Det er så flott å kunna ha med meg fleire, så på fredag skal eg berre nyta dagen i lag med kjekke folk, avsluttar Mauricio.
Elevane som entrar scena i Norske Talenter på fredag er Leah Hjortland, Isak Hjortland, Tomas Hjortland, Zena Albakry, Nils Aggvin, Franek Ostrowski, Live Vangdal, David Jacobsen og Sara Eikeland Femsteinevik.
