Sykla Jotunheimen rundt
1. juli gjekk det som av arrangørane blir kalla eitt av verdas vakraste sykkelritt av stabelen. Fleire frå Kvinnherad deltok.
Publisert
Sist oppdatert
Den 430 kilometer lange løypa er krevjande, med ei total stigning på 4609 meter, samt eit par tøffe utforkøyringar. Deltakarane blir med rette oppmoda om å vera godt trent før dei kastar seg med.
Fleire ryttarar frå Kvinnherad sykkelklubb stilte på startstreken; Reidar Pedersen, Rune Haugland, Oddvar Eikenes og Vegard Saghaug. Pedersen landa på ein 28. plass i sin klasse (M50-54), med lagkamerat Haugland like bak på ein 31. plass. Eikenes og Saghaug deltok i klassa M40-49, og i denne sykla dei inn til 53. og 54. plass.
Annonse
Også Vidar Mehl deltok i rittet, men ikkje for den lokale sykkelklubben.
Mellomtidene i rittet er notert ved Fagernes, Randsverk, Lom, Sognefjellet, Oskarshaug, Fortun og Marifjøra, og ved dei tre første låg Mehl på ein førsteplass i sin klasse (M30-39).
Då Mehl passerte tidtakaren ved Sognefjellet i nær 33 km/t, var han passert av to andre ryttarar. 3. plassen haldt han til og med då han sykla forbi tidtakaren ved Marifjøra, men før han passerte målstreken var han på ny blitt innhenta av fleire.
Tungt og seigt
Annonse
Sjølv poengterer han at problema byrja koma etter Lom: der møtte dei motvind, regn og lågare tepmeraturar, noko som førte til at rittet vart tungt og seigt.
«Aldri vore opp det fjellet før. Steike, det kjendest som ein evigheit før me endeleg såg toppen. Trass i at det var bratt og me jobba på, vart eg kald. Kald tvers gjennom. Og tja, om lag 500 meter før toppen tok fire mann oss igjen. Burde fint klart å halda følgje, men kroppen sa nei.» oppsummerer Mehl på Instagram etter endt ritt.
Det enda såleis med ein 5. plass i M30-39-klassa, til tida 13:46:52, 55 minuttar etter bestenoteringa.
Av dei 630 deltakarane som deltok i Jotunheimen rundt, sykla Mehl inn til ein respektabel 16. plass.
