Svein Kaptein er uroa for mjuke trafikantar som går til og frå Baroniet

I midten av juli fekk kommunen tilsendt eit brev frå Svein Kaptein Hovden i reiseverksemda See the Fjords, der trafikktryggleiken for dei mjuke trafikantane som vil gå til og frå Baroniet vart kritisert.

«Me køyrer ein del turistar til Rosendal, og dei fleste av desse vil gå opp til Baroniet. Å gå til Baroniet er ein flott tur, men trafikktryggleiken er skrekkelig dårleg. Det er ikkje forsvarleg å ha veg opp til ein slik attraksjon utan gangveg eller i det minste fortau, så dette burde vore sett på», skriv Hovden i brevet.

Han peikar vidare på at det ikkje er snakk om ein lang distanse, på ei strekke han vurderer frå Rosendal FUS Barnehage og bort til parkeringsplassen nedanfor Baroniet.

«Brua burde fått nokre fysiske sperringar, slik at gåande er skjerma frå trafikken her. Det ville vore mykje hyggelegare og sikrare dersom dette vart ordna», sluttar han.

Fylket sitt ansvar

Terje Natland, einingsleiar for veg og park, har no svara på innspelet til Hovden og See the Fjords.

«Kvinnherad kommune er oppteken av trafikktryggleik og er kjent med denne vegen og problema her. Vegen er fylkesveg, og vi har sendt innspel om utbetring og betre sikring av mjuke trafikkanter her», svarar Natland.

Vidare understrekar han at problemstillinga er teke opp i ulike planar i området, og at kommunen vil ta det opp med Vestland fylkeskommune når det høver.