Svein (67) køyrer racerbil: Sjå bilete og video
Måndag inviterte biblioteket til dataspel for seniorar. Denne dagen var Svein Røyrvik innom, og han fekk prøva seg på racerbil.
Publisert
Sist oppdatert
Rune H. Eikemo og Aria S. Haugsdal er instruktørane av dataspel-dagane for seniorar. Dei meiner det er eit flott og morosamt tilbod, og håpar fleire seniorar vil koma innom å prøva seg på dataspel. Dei håpar å få etablert dataspel-dag som eit fast tilbod på måndagar.
– Det er eit fantastisk tilbod der seniorane får prøvd ut morosam teknologi dei elles ikkje hadde, eller har moglegheit til å prøva ut. Her har me mange forskjellege speleaktivitetar, mellom anna VR-briller, bilspel og Nintendo. Dei som har vore innom til no har verkeleg fått auga opp for dataspel, og syns det er svært kjekt å få prøva seg. Nokre tenkjer at dette ikkje er noko for meg, då alt er nytt, men når dei først får prøvd seg, klarar dei ikkje å sleppa konsollen, ler Rune.
Annonse
Full fart
Då Grenda vitja biblioteket, fekk Svein Røyrvik ein leksjon i bilspelet før han sette seg i førarsetet. Gasspedalane og rattet vart justert, og det tok ikkje lange tida før Svein bikka 100 km/t og gliste frå øyra til øyra.
– Det var faktisk lettare enn eg hadde sett for meg, men det er farten i forhold til teknikken som er problemet, ler han medan han går inn ein djup konsentrasjon før neste sving kjem.
Hovudgrunnen til at Svein vitja dataspel-dagen var eit ynske om å inkludera seg meir i barnebarna sine interesser.
Annonse
– Barnebarna mine er skikkeleg oppdatert når det gjeld teknologien. Eg bestemde meg difor for å ta turen for å læra meg litt, slik at eg og kan vera med på leiken, smiler han og held fram:
– Bil-spelet var veldig kjekt når eg først kom inn i det. Eg prøvde å halda den same farten så eg har på hovudvegen, men det var ikkje enkelt. Når eg køyrer vanleg bil er eg ikkje så populær, for det samlar seg alltid mange bilar bakom meg, men det var ikkje tilfellet i dag.
Det vart ein morosam stund på biblioteket, og Svein var verkeleg nøgd med det teknologiske tilbodet for seniorar.
– Eg skal tipsa om dette tilbodet på onsdagsgjengen, som er ein dugnadsgjeng som møtes på Triohuset kvar tysdag. Ja, det er litt merkeleg at me heiter onsdagsgjengen då me møtes tysdagar, men det er logikk i alt me gjer, blunkar han.
Neste dataspel-dag for seniorar vert måndag 15. november i gamingrommet på biblioteket.
