Svartavatnet-konflikten hamnar i retten

Konflikten mellom Norwegian Pipeline Drilling AS og Kvinnherad kommune skal løysast i tingretten.

Som kjend enda arbeidet med å forbetra vassforsyninga i Husnes-området i strid mellom Kvinnherad kommune og entreprenør Norwegian Pipeline Drilling AS.

I fjor bestemte kommunestryet å auka kapasiteten til Husnes vassverk, slik at om lag 7.000 innbyggjarar på Husnes, Sunde, Valen og store delar av Halsnøy skulle få ei sikrare vassforsyning.

Det skulle etablerast eit borehol på 25 meters djupne i Svartavatnet, slik at tilgangen på vatn vart monaleg større. Samstundes skulle kapasiteten aukast frå 60-70 liter i sekundet med heverten til 480 liter per sekund med borehol. Eit prosjekt som vart kostnadsrekna til vel 19,2 millionar kroner eks. moms.

Sju dagar i retten

Norwegian Pipeline Drilling AS vann anbodskonkurransen. Men den 28. januar i år gjekk selskapet til det skritt å heva kontrakten med kommunen etter det dei meiner var betalingsmisleghald frå kommunen si side.

Kommunen på si side meiner at oppdraget ikkje er utført i tråd med kontrakten.

– Vi meiner dei ikkje har levert som avtalt, og held difor pengar attende no i sluttfasen, sa sektorleiar Sigbjørn Øye til Grenda i februar.

Med bakgrunn i denne konflikten sende Norwegian Pipeline Drilling AS, i følgje Kvinnheringen, inn ei varsel om søksmål til kommunen i juni, der dei krev 8,2 millionar kroner eks. moms i sluttoppgjerskrav frå Kvinnherad kommune.

No er det klart at tvistesaka skal opp i Haugaland og Sunnhordland tingrett 25. april neste år. Sakstema er vederlag etter heving av entreprisekontrakt, og det er sett av sju dagar i tingretten for å behandla saka.