Svarar på kritikken

– Eg snakka med politiet, og fekk deira referat ifrå ei melding om aktlaus køyring i fjellet. Eg har også snakka med beitelaget som har sett desse videoane der stillbileta er henta frå. Eg har dessutan sett delar av videoane, blant anna den ungdommen sjølv la ut i kommentarfeltet på vår Facebook-side, seier Sætrevik.

– Det skremmer meg at vaksne folk kan seia slike ting

– Desse klippa synest eg gjev støtte til vinklinga som er valt. Det kan derimot vera nyansar her som har gått tapt, men når det gjeld bileta me har valt, så har me valt dei fordi me følte at desse synte kritikkverdig køyring, forklarer han vidare.

Redaktøren understrekar også at han i saka refererte til og siterte direkte ein samtale med politiet. Der står det: «… Nokon av videoane viser at det er dyr langs vegen, og at desse blir skremde og plaga av køyringa. Me er kjent med slike videoar, og har fått bekymringsmeldingar frå beiteeigarar om dette, opplyser han vidare». «Han» er i dette tilfellet politistasjonssjef Sigurd Børve.

Kommentarfeltet

Slik som ungdommen og familien reagerer, reagerer også Sætrevik på korleis kommentarfeltet utarta seg på Facebook-sida til Grenda.

– Me såg tidleg at kommentarfeltet måtte passast på, og det er godt mogeleg at me skulle røkta det endå hardare enn me gjorde. Me valte på laurdag å sletta heile Facebook-saka fordi det var for mange meldingar som var oppunder og over kanten. Når me så vart gjort kjent med at den omtalte ungdomen er mindreårig, så er det klart at det er ganske mange som går alt for langt i sine kommentarar i høve saka, seier redaktøren.

– At det blir så hardt at familien og guten kjenner på lynsjestemning, er trist. Det var for mange vaksne folk som kommenterte i noko som såg ut som affekt. Eg trur at ein del ville kvidd seg for å seia det same ansikt til ansikt til ungdomen det gjeld, og då burde dei heller ikkje skriva det, understrekar han.