Svaler på (over)farten
Ferja Lærdal går som ferje nr. 2 i trampfart mellom Årsnes, Gjermundshamn og Varaldsøy, døgnet rundt på kvardagane. Når ein vil spara nokre spinkle minutt på overfarten freistar ein vanlegvis å unngå turen innom Varaldsøy - men dette kvarteret er det ikkje alle som bryr seg om.
Publisert
Tydelegvis er det ikkje alle som har den same trongen til effektivitet. Eventuelt er dei merksame på at Lærdal på enkelte avgangar kanskje er 2. valet for mange av dei reisande over Kvinnheradfjorden.
To svalepar har nemleg funne sin utvalde hekkestad på sidehusdekket på nettopp denne ferja, som døgnet rundt klappar til kai på alle desse ferjestøa. Berre på nattetid i helgene står Lærdal i ro, då ho ligg ved Årsnes ferjekai.
Annonse
Grenda sin utsending observerte jamt over tre svaler i aksjon ved reira på overfarten, som i dette høve var 15 minuttar lengre enn vanleg. Dei var konstant travle med å vedlikehalda reira og finna mat. For insekta som svalene livnærer seg på er våtmarksområde, innsjøar og elver livsviktige næringskjelder. Om det då er områda rundt Årsneselva, Nedrevågselv og Vikelva eller Sagbekken som er svalene sine føretrekte serveringsstader er per i dag uvisst.
På ei veke flyttar Lærdal seg, etter det Grenda klarar å rekne ut, om lag 715,8 kilometer. Utgangspunktet for utrekninga av denne strekninga er basert på avstanden mellom ferjestøa slik som den vert formidla gjennom Google maps, og ferjerutenene til Fjord1. Det er uvisst kor lenge svalene har teke seg til rette på sidedekket, men noko særleg plagsame kan dei ikkje vera.
– Eg visste ikkje at me hadde svaler om bord ein gong eg, kunne ein representant frå det påtroppande skiftet melda om, då Grenda ringte for å høyre kva tankar dei hadde gjort seg om desse snikpassasjerane.
Sosiale fuglar som likar seg på vengjene
Annonse
Svalar nyttar gjerne mykje tid i lufta, og desse fire ser også ut til å vera glade i å vera på farten når dei ikkje er på vengjene. Ofte hekkar dei på same plass år etter år, kor takmøner er ein av dei mange typiske stadene. Sidehusdekket på Lærdal er i så måte ein heilt kurant stad å etablera seg. Når ferja samstundes er gratis for passasjerar utan køyretøy, må det seiast at dei har ordna seg godt.
Hadde svalene på Lærdal blitt spurt er det dimed rimeleg å anta at planen om ferjefritt Sunnhordland ville fått eit samrøystes nei.
