Svært mange 9-12-åringar brukar sosiale medium

Medietilsynet presenterer no funna i deira nye undersøking «Barn og medium 2024». Sidan 2006 har tilsynet samla informasjon om mediebruken blant 9-18-åringar gjennom undersøkingar både blant barn og foreldre.

Ifølgje «Barn og medium 2024» har 94 prosent av 9-11-åringane sin eigen mobil, medan andelen var 85 prosent for ti år sidan. 60 prosent av 9-12-åringene fekk sin fyrste mobil før dei fylte åtte år, medan 35 prosent av dagens 17-18-åringar fekk mobil så tidleg.

– Vi ser ei utvikling der barna er yngre når dei får mobiltelefon, og dermed også i større grad har tilgang til internett utan at vaksne er til stades. Då blir det ekstra viktig å syta for best mogleg beskyttelse mot skadeleg innhald og ubehagelege opplevingar, seier direktør Mari Velsand i Medietilsynet i ei pressemelding.

Kan vera skadeleg

86 prosent av 9-18-åringane brukar sosiale medium. Trass i at det er 13-års aldersgrense, er 53 prosent av niåringane, 58 prosent av tiåringane og 72 prosent av elleveåringane på sosiale medium. 27 prosent av foreldra til 9–12-åringar svarar at deira barn brukar sosiale medium dagleg eller kvar veke.

– Tala kan tyda på at bruken av sosiale medium er større blant dei yngste barna enn mange foreldre er klar over. Dette er tenester der vi veit at barn kan bli eksponert for både innhald og åtferd som kan vera skadeleg for dei, eksempelvis vald, kroppspress og ulovleg bildedeling. Medietilsynet si klare anbefaling til foreldre er derfor å overhalda 13-årsgrensa, seier Velsand.

Går utover søvnen

Dei mest brukte tenestene blant barn og unge er Snapchat (70 prosent), TikTok (58 prosent) og Instagram (46 prosent). 45 prosent av 9–12-åringane svarer at dei får lov av foreldra til å bruka Snapchat, omtrent det same som i 2022.

Elles opplever meir enn kvar fjerde 9–18-åring at bruk av sosiale medium går utover søvnen, og nesten tre av ti skulle ynska at dei klarte å logga av oftare.