SV vil stoppa Hordfast

Vestland SV gjennomførte sitt fylkesårsmøte laurdag og søndag. Der vart det bestemt å jobba for å stoppa Hordfast. Silje Nordtveit Olsen frå Husnes sit i fylkesstyret.

I helga hadde Vestland SV fylkesårsmøte i Bergen. Hege Lothe frå Gloppen vart attvalt som leiar. Silje Nordtveit Olsen har allereie plass i fylkesstyret, og var ikkje på val denne gong.

Møtet vedtok partiet sitt nye fylkestingsvalprogram.

– Vårt mål er å holde høgresida vekke frå styringa av Vestland fylkeskommune. Vestland treng meir rettferdig omfordeling og meir klima- og miljøpolitikk, ikkje mindre, seier fyrstekandidat Marthe Hammer i ei pressemelding.

Avviklast snarast

Vidare godkjente møtet ein uttale om å stoppa ferjefri E39 og Hordfast.

«Det viktigaste for SV dei neste fire åra er å stoppe ferjefri E39 med flytebru over Bjørnafjorden (Hordfast). Dette er eit motorvegprosjekt som i tillegg til å vere eit enormt naturinngrep som raserer unik og verneverdig regnskog, som legg opp til kraftig trafikkauke inn til Bergen, set alle andre samferdsleprosjekt i Vestland i fare. Skal ein få til satsing på ny rassikker veg og jernbane K5, bybane i Bergen, rassikring og vegvedlikehald for trygge bruksvegar i fylket, må dette prosjektet avviklast snarast», heiter det.