SV ute av regjeringskabalen – stortingssjansen aukar for Myrvold
Onsdag takka SV for følgjet i regjeringssonderingane. Med berre Ap og Sp igjen, aukar sjansen for at Hans Inge Myrvold får stortingsplass.
Publisert
Sist oppdatert
Då Audun Lysbakken pakka kofferten og tok med seg resten av Sosialistisk Venstreparti ut av regjeringssonderingane på Hurdal onsdag ettermiddag, vart det klart at det no er Arbeidarpartiet og Senterpartiet som går saman om å styra landet dei neste fire åra.
– Ein er blitt litt klokare på regjeringsforhandlingane, meiner ordførar Hans Inge Myrvold (Sp).
Annonse
Toppe mest aktuell
Han er blant dei som er mest spent på utfallet av forhandlingane hans parti no skal ha med Arbeidarpartiet. Når taburettane skal delast på to parti, blir sjansen for ministerpostar til Senterparitet større. Det aukar også sjansen for at Kjersti Toppe kan bli minister. Skjer det, blir Stortinget arbeidsplassen til Kvinnherad-ordføraren så lenge Toppe er ein del av regjeringa.
– Kjersti Toppe er av dei mest erfarne og rutinerte frå området, og ho er aktuell for fleire av ministerpostane, trur eg. No er det om å gjera å sy saman det beste laget for den komande regjeringa, seier Myrvold.
Han spår nokre endringar i minister- og departementsstrukturen.
Annonse
– Ein eigen distrikts- og digitaliseringsminister er unaturleg for ei regjering med Senterpariet i. Det trur eg vil høyra heime under kommunaldepartementet, spekulerer Myrvold.
Samarbeid
Han meiner det har vore eit veldig fokus på vinnarar og taparar etter sonderingane i Hurum.
– I eit samarbeid er det viktige saker som ein må avklara. Det har partia brukt tid på no. Det står respekt av SV sin konklusjon, men dei har vore tydelege på at dei vil vera ein samarbeidande kraft på Stortinget, seier Myrvold.
Han minner om at ein dei siste åtte åra berre har hatt fleirtalsregjering i eitt år. Dette blir situasjonen framover også.
– Det krev eit samarbeid med Stortinget framover. Dette er ei større utfordring for Støre enn om ein hadde hatt med SV i regjeringa, men det er likevel til å leva med. Ein får ein dynamikk i politikken, og meir av politikken kjem tilbake til Stortinget, vurderer Myrvold.
Annonse
– Det var eit klart svar om endring på valdagen. Sosial utjamning, geografisk utjamning, begge deler må til no. Summa summarum tenkjer eg at det er ein tydeleg retning etter valet. Det blir spennande, sluttar Myrvold.
