Suverene Strand-Ulv

U17-jentene til Strand-Ulv gjekk i helga til topps med stil då dei vann sin fjerde av fire moglege turneringar i 1. divisjon denne sesongen.

Etter å ha teke komfortable sigrar mot Viking, Rossvoll, Gneist og Sotra i Husneshallen laurdag, kunne jentene til Ragni Hestad løfta hendene over hovudet og jubla over det som har vore ein fantastisk sesong i 1. divisjon. Utan snev av svakheitsteikn har dei trona øvst på alle av sesongens turneringstabellar, og har med det full pott og 120 poeng å visa til når sesongen no er ferdigspelt. 18 poeng føre Rossvoll som vart nummer to.

Då kunne ikkje U17-gutane vera noko dårlegare. Etter ein tredjeplass i Sveio, gjorde dei nok til å sikra seg sølvmedalje frå årets sesong.

 

Travel helg

Men det var ikkje berre U17-jentene til Strand-Ulv som var i aksjon på nettkanten i Husneshallen laurdag. Trio var nemleg vertskap for det som er sesongens siste seriehelg for Hordaland sine 17 år gamle volleyballspelarar, og arrangerte turnering for nærare 200 ungdommar denne helga.

I 3. divisjon var både Trio og Strand-Ulv 3 i aksjon, og det var også dei som skulle hamla opp om dei øvste posisjonane. Trio vann alle sine kampar med 2-0 i sett, og gjekk med det til topps på heimebane denne helga. Strand-Ulv tapte berre kampen mot Trio og vart med det nummer to.

Trio 2 tapte sine tre kampar og enda sist i sin klasse.

 

Meir Strand-Ulv-jubel

Men det var meir jubel i vente for Strand-Ulv denne helga. I Øystese var 13-årslaga i aksjon. Og det gror godt på nordsida. Etter å ha blitt nummer tre på si fyrste samling denne sesongen, har gutane ikkje sett seg tilbake. Og kan etter å ha gått ubesigra ut av helga i Øystese, jubla over ligagull i sin klasse med 114 poeng.

Det kan også U13-jentene gjera. Som likeins med sine eldre lagvenninner i U17-klassen, har feid all motstand av banene heile sesongen gjennom. Full pott og 120 poeng vart krona med nok ei strålande helg og pokal i Øystese.