Sushi-kokken som ikkje et sushi

– Det er sushi no, og så blir det utvida med asiatisk mat seinare. Eg må venta til son min er ferdig med skulen i Oslo før me kan byrja å tilby asiatisk mat. Rundt første juli har me det på plass, seier den nepalske 40-åringen.

Limbuzz har fartstid som sushikokk i Rosendal, og jobba på Gjøa Sjømat fram til hausten 2022. I januar var han tilbake på Gjøa, i noko som vart eit kort-kort opphald i Rosendal.

– Eg har hatt ein restaurant i Oslo frå i fjor, som eg måtte tilbake og ta meg av. Det var ikkje nok kundar der, så eg har sett meg om etter ein anna plass å driva. Det har eg funne no, seier han om at han no skal eiga og driva restauranten Do Mo Sjømat på Snikkeriet,

Et ikkje sushi sjølv

– Eg kjem til å få litt hjelp, ikkje inne på kjøkkenet – det tar eg meg av sjølv, men til å ta telefonar og handtera kundar. Eg har allereie laga til ein meny og fått han på plass på nett og fysisk, seier han til Grenda første dagen han har drift.

Kaka leiger kjøkken og bar av Eli Kvalvågnes, som har trappa ned si drift på Snikkeriet.

– Eg sat på småbruket vårt i Åkra og skreiv annonsen om at me ville leiga ut kjøkkenet på Snikkeriet på laurdagen, og skulle ha han i Grenda på tysdagen. Så på søndagen fekk eg ein telefon frå ein felles bekjent som visste om ein interessent. Deretter gjekk det fort, fortel Kvalvågnes til Grenda.

Førebels er det berre take away han tilbyr, men Kaka trur at kanskje frå neste veke vil restauranten kunna ta i mot gjester.

– Det er eit fint restaurantlokale. Eg treng litt meir plass på kjøkkenet, litt meir vaskeområde og litt meir armslag for meg når eg lagar maten.

– Kva er din favoritt frå menyen?

– Eg et ikkje sushi sjølv, eg berre lagar det. Me asiatar et ikkje rå mat, forutan japanarane og koreanarane då, så eg et ikkje det eg sjølv lagar, smiler han.

– Ulike kokkar har ulike stilar, men felles for alle er at maten er handlaga. Eg har min måte å gjera maten min, og pleier å laga min sushi veldig fast, legg han til.

Får kona og barna over frå Austlandet i sommar, og då blir menyen utvida. Vinterstid er han meir usikker på kundetilfanget i bygda.

– Me kjem til å vurdera korleis det blir etter kvart, seier han.

Snikkeriet Scene held fram

I over 20 år har Snikkeriet halde på som musikkscene.

– Det er booka eitt til to arrangement i månaden ei tid framover, som eg skal hjelpa til å få arrangert. Ein ser på korleis ein eventuelt kan driva musikkdelen vidare, og skal ha eit møte for å etablera ei interessegruppa for Snikkeriet Scene, fortel Kvalvågnes til Grenda.

– Scenen er eit tilskot til Kaka si drift, og tilbakemeldingane me har fått er at det er behov for musikkscenen til Snikkeriet. Over mange år er det lagt til rette for at musikarar skal kunna koma og opptre, og det har vore eit publikum som har vore glade for dette. No i ein overgangsfase skal eg hjelpa til å få drifta den delen, legg ho til.