Superyacht overnatta ved Ølve

«Norn» er litt av ein farkost. Yachten vart bygd i Tyskland og overlevert i fjor. Designet har norske Espen Øino stått for. Båten er 90 meter lang, og siglar under flagget til Caymanøyane. Om bord er det plass til eit mannskap på 20 samt 16 gjester. Sistnemnde har åtte lugarar å velja blant. Prisen vert estimert til 250 millionar dollar, noko som med dagens kurs tilsvarer vel 2,7 milliardar kroner.

Eigar av «Norn» er milliardæren Charles Simonyi. Det er ein ungarsk-amerikansk programvareutviklar, som er mest kjend for å ha laga dei fyrste versjonane av Microsoft Office, deriblant Word og Excel. Han er også ein romturist, og har vitja den internasjonale romstasjonen to gonger. 75-åringen skal vera god for om lag 80 milliardar kroner.

Den siste tida har «Norn» blitt observert både i Stavanger, Lysefjorden og utanfor Bergen. Søndag kveld var båten i Eidfjord, før den natt til måndag låg i ro i Ølvesvikjo utanfor Dalsjøen.

Tysdag føremiddag viste nettstaden Marinetraffic at «Norn» var i fjorden mellom Fana og Sotra. Kor vidt eigaren sjølv er om bord, er ikkje kjent.