Sundedamene samla inn pengar til Ukraina: - Me er veldig nøgde

I etterkant av hendinga kunne Cecilie Thorsen fortelja korleis det gjekk og kor mykje dei samla inn i løpet av kvelden.

– Om tala eg har fått opplyst er riktige, fekk me inn 57.531 kroner. I forkant hadde me inga formeining om kor mykje me kunne få inn, så dette er me veldig nøgde med. Men det ville ikkje vore mogleg hadde det ikkje vore for den enorme givargleda med gåver til basaren og auksjonen, så me må berre nok ein gong sei tusen takk til alle som bidrog med flotte gevinstar, seier ho.

Pengane som kom inn på basar, auksjon og ein kveld full av underhaldning gjekk til Salam LADC Norway, som jobbar med naudhjelp i Ukraina. Salam, som betyr fred på arabisk, jobbar med å dekke dei grunnleggande behova til menneske på flukt.

Delte eigne erfaringar

Cecilie Thorsen var initiativtakar for hendinga, som drog menn og kvinner av huse. I opningstalen sin, som Grenda har fått tilsendt i ettertid, delte ho av sine eigne erfaringar frå arbeid med flyktningar:

Eg har sett kor mykje dei små tinga betyr, kor store dei blir når ein har lite.

Eg har sett korleis ei banan nærast vekka ein baby til live etter å ha vore dagevis uten mat fordi mora hadde mista mjølka.

Eg har sett korleis ei flaske vatn har sløkt tørsten til ein som ikkje har drukke vatn på tre dagar, då han skjulte seg i dei tyrkiske skogane.Vel hadde han svelgd store mengder saltvatn på sin veg, då båten havarerte ein kilometer frå land. Han kunne ikkje symja, men heldigvis hadde han ein redningsvest som fløyt, ikkje ein som var fylt med høy eller liggjeunderlag, laga i Tyrkia fordi det der var billigare, men nærast umogleg å få tak i flyteelement.

Eg har sett ei mor gråte av glede over å få sinksalve og ein bleiepakke fordi guten hennar hadde gått i fleire dagar med same bleie. De kan sjølv tenkja dykk korleis den guten hadde det.

Talen fekk ho mykje skryt for, og arrangementet vart i seg sjølv rosa av dei som hadde tatt turen.

– Folk meinte det var ein fin kombinasjon med åresal, ølsal og dans, noko me sjølvsagt var glade for å høyra. Elles var det mange som sa at «endeleg skjedde det noko!», etter to år med pandemi, seier ho vidare.

Rask løysing på toalettutfordring

Utpå kvelden fekk arrangørane likevel hjarta litt oppi halsen, då toalettfasilitetane brått vart avgrensa. Som følgje av dette oppsto det ein kø av trengde menneske, men heldigvis løyste utfordringa seg på rekordtid.

– Bjørnar Skogseth drog til, og fiksa eit festival-do på 25 minutt. På ein laurdagskveld! Det er heilt fantastisk, skryt Thorsen.

Ho skryt elles også over DJ'en som fekk dansegolvet til å yra utover kvelden, trass i at han elles pleiar å svitsje lydfiler for ei heilt anna målgruppe.

– Det var første gong han spelte for andre enn ungdomsklubben, men det var kjempegod stemning på dansegolvet. Eg er heilt imponert, sluttar ho.