Suksess for følsjå i Rosendal

Totalt var det 15 påmeldte føl til følsjået denne sundagen, der det var 12 av dei som faktisk møtte. Av alle føla som var med var det tre av dei som var av andre rasar, to dalaføl og eitt kaldblodsføl.

– Det var ein del folk som møtte opp, både folk som var med som utstillarar, men også lokale. Eg skulle derimot gjerne sett at det hadde vore endå fleire hestefolk frå kommunen med, fortalde medarrangør og leiar for Kvinnherad fjordhestlag Janne Alsaker.

– Me fekk i etterkant mykje skryt for arrangementet. Til å vera eit lite lag der berre styret bidrog til å arrangere sjået, og to av styremedlemane også hadde eigne føl, så klarte vi å ro det i land, understreka Alsaker.

Vinnarane

I kategorien Beste føl av andre rasar så var det Vivild til Veronica Hellestveit frå Ølve som vann. Dommaren omtala følet som sterkbygd føl av god type, med velforma hals, fint hovud og velstilte bein med markerte ledd.

– Blant fjordhesthoppene så var det reint Kvinneradsoppgjer med alle tre hoppene frå kommunen, sa Alskar.

Av dei tre deltakande hoppene var det Hanne og Ingve Hesjedal si Vidsyn Rosa som stakk av med sigeren der. Dommaren omtala følet som eit velutvikla føl av god type med eit fint hovud, velforma hals og ein sterkbygd kropp med god muskelretning.

– I hingsteklassen var det seks hingstar som møtte, der to av dei var lokale, fortsette Alskar.

Beste plassering for kvinnheringane i den klassen gjekk til Trygve Nes sitt føl Nes Brage med ein tredjeplass, medan Emmas Føniks til Renate Weberg og Audun Steinar Vågen fekk sløyfe og god omtale.

– Beste hest blei Eikeli Sander, eigd av Tone Helen Bache frå Arna, avslutta Alsaker.