Suksess etter opninga på Halsnøy

– Det gjekk kjempebra, og me hadde ingen problem under opninga. Det var mange som kom innom, langt fleire enn forventa, og folk var veldig nøgde. Utover kvelden hadde me to vakter som passa på både ved hovudinngangen og inn til puben, og etter festen serverte me nattmat, fortalde den erfarne restaurantdrivaren.

Ekte heimelaga

Zengana flytta til Halsnøy for om lag eitt år sidan etter å ha drive ulike restaurantar i Trondheim gjennom 22 år.

– Kvifor valde de å flytta til akkurat Halsnøy?

– Tja, sei det. Eg kom over ei annonse på nett om eit ledig lokale her, så snakka eg med eigaren og fekk beskjed om at det var berre å koma, lo Zengana.

– I tillegg er det ei veldig fin øy. Me trivs godt her, det er det ingen tvil om. Folka her har teke godt i mot oss og er veldig trivelege, understreka han.

Då dei fyrst flytta til Halsnøy starta dei restaurantdrift i eit anna lokale, etter om lag eitt år er han og dei tre andre tilsette no på plass i den tidlegare bensinstasjonen, som også er nyrenovert.

– Me er to som jobbar heiltid, i tillegg har me to som skal jobbe deltid. Eigarane Kjell Henning og Reidun har hjelpt oss masse etter at me kom inn i lokalet her for tre månadar sidan, og fram til opninga no. Det er takk vera både dei og Alf at det har blitt restaurert her, og me er kjempetakksame for alt saman, poengterte Zengana.

Restaurantdrivaren fortalde at det førebels er mest pizza og rullekebab som kundane har bedt om.

– Til rullekebabane lagar me ekte heimelaga brød kvar dag i pizzaomnen, understreka han stolt.

No ser restaurantdrivaren framover med eit klart mål i sikte.

– Me håpar sjølvsagt at det går bra med restauranten og at folk vil bruke lokala. Når folk kjem innom så ynskjer me at dei skal kosa seg og bli nøgde, avslutta han.