Styrketrening som lågterskeltilbod på Seim
Synneva Seim har i mange år hatt ein idé om trening i Skyttarhuset på Seimsfoss. I byrjinga av året starta ho opp treninga - til overveldande respons.
Etter å ha trena ein del år i Frisklivssentralen, blei ho sjølv veldig glad i styrketrening. Då bestemte Synneva seg for at ho ville starte opp med slik trening i Skyttarhuset, og 4. januar var det ingen veg tilbake. Ho inviterte til trening, og satsa på at folk ville koma.
– Responsen har vore kjempegod, heilt utruleg! Eg ble overgjeven av all interessa, alle slag møtte opp. Pensjonistar, småbarnsmødrer, damer og menn, seier ei nøgd Synneva.
Annonse
I utgangspunktet var tanken ein time trening kvar torsdag, men lite visste ho at ideen hennar skulle bli så populær.
– I nokre veker var det så mykje som 80 treningsglade personar innom skyttarhuset, og då heldt ikkje éin time kvar torsdag, fortel Synneva.
Ho utvida tilbodet til tre timar både tysdagar og torsdagar.
Vel intensitet sjølve
Annonse
– Nokre timer er lette, andre meir tunge og nokre er tiltenkt berre menn. Dette er enkel trening du kunne gjort heime på stovegolvet, men som du ikkje gjer. Det er noko med å kome i lag og gjere det saman, seier Synneva.
Timane har tatt sikte på å trene heile kroppen gjennom sirkeltrening med ulike stasjoner beståande av varierte øvingar.
– Alle øvingane blir gjennomført på tid så ein kan sjølv bestemme intensitet ved å velja anten få repetisjonar eller mange. Treninga skal ikkje vera for seriøs. Vi fokuserer på det vi kan, og vi skal ha det kjekt, forklarer Synneva.
Eit førebyggjande helsetiltak
Treninga går føre seg i regi av Seimsfoss Grendalag og Synneva fekk innvilga midlar til husleiga, resten er dugnadsarbeid. Treninga er tenkt som eit lågterskel-tilbod og er for alle over 16 år, uansett føresetnad. Synneva er sjølv med og trenar og ho kjenner godt på eigen kropp kva styrketreninga har bidrege til.
– Humøret er betre, arbeidet enklare og tenkjer på alt det eg kan førebyggja med tanke på eiga helse. Det å trene med andre gjer at eg får dekka mine sosiale behov og sjølve opplegget gjev meg mykje tilbake, deler ei sprudlande Synneva.
Annonse
Oppstart til hausten
Det manglar ikkje på ros blant deltakarane. Ei seier ho kallar treninga for «Påfyll av Synneva», sidan ho gir så mykje av seg sjølv i timane og motiverer på ein så bra måte. Andre seier at Synneva alltid er like blid, og at dette har ein god smitteeffekt på deltakarane. Alle er samde om at det er eit særs bra tiltak, og dei kjenner at helsa er i betring.
– Synneva er så kjekk! Eg kjenner formen er mykje betre, seier Vigdis Uglehus Bøyum som har vore med frå start.
Dersom det blir dårleg ver i sumar kan det og bli nokre impulsive treningstimar i skyttarhuset. Elles gler Synneva seg til ein ny og frisk oppstart i haust, og håper å sjå igjen både kjende og nye fjes.
– Sånne tilbakemeldingar og sånn utvikling som eg ser på dei som har vore med, er sjukt motiverande. Eg held fram tilbodet så lenge det kjem folk, seier ein håpefull og nøgd Synneva.
