Styrkar marknadsføringa av Kvinnherad: – Må jobba hardt mot sentralisering

I den nye økonomiplanen er det sett av 200.000 kroner årleg til kommunikasjonsarbeid og aktiv marknadsføring av Kvinnherad kommune.

«Midlane skal nyttast på best mogleg måte for å styrkje kommunen sitt omdømme, fremje lokalsamfunnet sine kvalitetar og tiltrekkje nye innbyggjarar, næringsliv og besøkjande», står det.

– Vi er ein skjult juvel. Vi har låge levekostnader, vi har mange arbeidsplassar, og vi har natur i verdsklasse, sa Kristoffer Tufta (H) under budsjettdebatten i Kommunestyret førre veke.

– Det er rett og slett marknadsføring som skal til for at vi skal bli litt fleire her, la han til.

Mot sentralisering

Også Silvia Tofte (H) hadde nokre tankar om midlane.

– Vi ynskjer at Kvinnherad skal bli synleggjort som den gode plassen Kvinnherad er når det gjeld å bu, veksa opp og verta gammal i. Eg håpar at ein er litt kreativ og ser på kva som er mogleg å få til, oppmoda ho.

Tofte karakteriserte marknadsføring av Kvinnherad som ein kjempeviktig jobb framover, også for politikarane.

– Vi er nøydde for å jobba hardt mot sentralisering, og då sentralisering langt vekk frå Kvinnherad, påpeika ho.