Styrka fylkesøkonomi gjev straumstønad til kultur og museum

Då fylkestinget gjekk gjennom den hyggelege årsrekneskapen for 2021 denne veka vart det bestemt at 260 millionar kroner skulle fordelast på ulike tiltak i fylket.

– Me vil gje fire millionar til å dekke auka kostnader til straum innan kultur og museum, 15 millionar ekstra til læremiddel i den vidaregåande skulen, og åtte millionar til vidare utbygging av breiband, seier fylkesordføraren til Vestland fylkeskommune.

Dei fire millionane skal bidra til å kompensere for auka straumutgifter for museums- og kulturinstitusjonar.

Meirkostnadar for lokale museum

Fylkesdirektøren har innhenta oppdatert kunnskapsgrunnlag om meirkostnader knytt til auken i straumprisane for kulturinstitusjonar som mottek driftsstøtte frå fylkeskommunen i 2022.

På denne lista finn ein Baroniet Rosendal og Sunnhordland museum.

Førstnemnde har som følgje av dei høge straumprisane hatt ein meirkostnad på 215.180 kroner i desember 2021 til mars 2022, i forhold til same periode året før.

Sunnhordland museum sin meirkostnad til straum har vore på 103.100 kroner i same tidsperiode.

Statleg ansvar

Grunna fylkeskommunen sin totale økonomi rådde i utgangspunktet fylkesordføraren frå å ta vidare ansvar for ekstra straumkostnadar for kulturinstitusjonane.

I Vestland fylkeskommune si innstilling vart fylkesordføraren si tilråding motsagt (datert 01.06.22). Sjølv om dei understreker at det er eit statleg ansvar å finansiere museum, ønskjer fylkeskommunen å bidra med ei eingongsstøtte:

«I lys av den prekære situasjonen mange kulturbygg og institusjonar i Vestland er no, vil fylkeskommunen likevel yte ein avgrensa eingongsstøtte til dekning av dei ekstraordinære utgiftene. Dette vil bli finansiert ved bruk av midlar frå rekneskapsoverskotet for 2021.»