Stuntpoeten i pølsa

22. september starta prosjektet som har fått namnet «Revy-Norge Rundt» opp. Dette er sett i gong for å stimulere til ny giv i revy-Norge, og målet er at revyproduksjon skal halda fram i alle landet sine regionar.

Gjennom satsinga reiser eit kompani med lyd- og lysteknikarar, kameraoperatørar, produsentar, revyinstruktørar og journalist rundt i landet. Saman med lokale revyentusiastar skal dei laga livesendingar frå åtte stoppestadar. Turnéen varar i ein månad, og showa vert direktesendt på Humorportalen. I tillegg til revyinnslaga, får ein også presentert klipp frå produksjonen sitt opphald.

Hyllest til revyen

Produksjonen ønskjer nemleg å møta menneske og stader som har vore, og er viktige for revyen på kvar stoppestad. Likeins ønskjer dei å undersøkje kva revy har betydd for dei ulike stadane, og for menneska som bur der.

Då produksjonen gjesta Fitjar var Arne Torget ein sjølvsagt gjest.

– Det er jo fordi at eg har samarbeidd med Ole Bergesen i nokre år. Dei siste tre åra har me gjort ein del i lag, og eg har også bidrege med ein del tekstar til Fitjarrevyen, fortel poeten.

Han er takksam for at han har eit miljø å vera del av, då revy- og teaterscena i Kvinnherad er ganske brakk om dagen.

– Det har jo ikkje vore sommarrevy her på nokre år, og eg er blitt ein einsam ulv, seier han.

Men einsame ulvar har også moglegheit å skapa seg eit levebrød av ord og formidling, noko Torget har gjort til gagn. Etter at han deltok på TV-programmet Norske Talenter har han dessutan merka at publikummet hans er blitt breiare, og at folk lyttar meir merksamt på det han har å formidla.

På eitt av Arne sine seinaste oppdrag fekk han høyra at ei av diktframføringane hans gav gjesten større utbytte enn ein kveld i kyrkja. Denne tilbakemeldinga kom frå ein fitjarbu, og er noko ein sjeldan høyrer ein fitjarbu, som dreg kyrkja inn i daglegtalen, uttale.

Norge sitt løgnaste meisterskap

Livesendinga førre torsdag baud på innslag frå Strand revylag, Fitjar Teaterlag og ved Marit Olde frå Voss. Publikum var invitert til å følgje med frå salen, og publikumsfavoritten gjekk vidare til neste runde. Strand revylag sitt innslag enda dermed opp som finalist i NM i revy, som går føre seg i Olavshallen i Trondheim, 5.- 6. november.

Arne, som var med på scena i Fitjarrevyen sitt innslag, vil dimed ikkje ende opp i Trondheim for å spele revy første helga i november.

– Men eg har skrive eitt av innslaga til Fitjarrevyen som allereie er gått til finalen, så sånn sett vil eg likevel vera representert, fortel han vidare.

Influencer Arne

Ina Dahl, som er dagleg leiar i Norsk Revy, fekk seg ei aha-oppleving då ho først møtte stuntpoeten frå Husnes. Først då forstod ho kor interessa for å bruke dikt i revy kom frå, ei interesse som visstnok er merkbar landet over.

– Eg er vel det ein kan kalla influencer, ler Arne, som sjølv ikkje var klar over kor sterkt stuntpoesien hans har påverka revymiljøet i Norge før han møtte Dahl.

Den einsame ulven – som las Sigbjørn Obstfelder og byrja skrive eigne dikt i ein alder av 13 – har «holdt på med si sære greie» i over tretti år. Men med den greia har han skapt seg eit namn, langt utanføre både Kvinnherad og kommunane rundt. Og når det no er Revy-Norge Rundt, er han både glad og takksam for å få ta del i turnéen.