Strengt nødvendig løft for fastlegeordninga

I vårt fyrste heile statsbudsjett kjem me med eit strengt nødvendig løft for fastlegeordninga. Altfor mange fastlegar har stått, og står i, krevjande situasjonar med lange pasientlister og for få kollegaer å støtte seg på. Situasjonen for fastlegeordninga er alvorleg, og trugar alle sin tilgang på gode helsetenester uavhengig av kva ein tener eller kor ein bur.

Difor tar vi tak og styrker fastlegeordninga med nær 700 millionar kroner til neste år. Slik skal vi gje legane kortare pasientlister og betre tid med pasientane. Slik tar me grunnleggjande helsetenester til alle innbyggjarar i heile landet på det største alvor. Slik kvittar me oss med den byrda arven frå den tidlegare Høgre-regjeringa har vorte for fastlegeordninga.

Som ledd i denne satsinga, vil kommunane no i større grad kunne frigjera rammeinntekter til andre naudsynte tenestetilbod. Endringane består av at me innfører eit differensiert basistilskot frå 1. mai 2023.

Eigenskapar som alder, kjønn og helsetilstand vil avgjera kor mykje tilskot fastlegen får. Fastlegen vil få eit høgare basistilskot for pasientar med større behov for oppfølging. Innføringa skjer på ein slik måte at svært få leger tapar inntekt. Slik gir vi legane moglegheit til å ta ned listelengda eller tilsette andre fagfolk i praksisen sin.

Dette er eit stort steg i rett retning for å sikra likeverdige helsetenester i alle kommunar i heile landet. Samstundes er det viktig at det nylig utnemnde Ekspertutvalet får arbeide med ytterlegare forslag til tiltak. Tiltaka kan vi få med i neste budsjett igjen.

Mange har kjent på ei sterk uro rundt fastlegeordninga. No skal me få stabilisert fastlegedekninga. Dei nye tiltaka vil motverke den veksande andelen pasientar som står utan fastlege, og redusere bruken av dyre vikarløysingar. Slik styrkar vi ei av dei viktigaste teneste vi har – over heile landet.

Hans Inge Myrvold, helsepolitisk talsperson for Senterpartiet