Streiken er avblåst – LO og NHO einige på overtid

LO og NHO er einige i meklinga i årets tariffoppgjer. Med det går kollektivtrafikken som normalt måndag morgon.

Søndag ettermiddag kom LO, YS og NHO til einigheit i årets tariffoppgjer.

Det betyr at bussane ikkje kjem til å stå stille måndag morgon.

Riksmeklaren la fram eit forslag på ei løysing som gir eit generelt tillegg på 2,25 kroner, og eit ekstra tillegg for dei lågast løna på 1 krone per time.

- No har Riksmeklaren vald å leggja fram eit forslag til ei løysing med ei ramme på ein lønsvekst på 2,7 prosent. Det var 0,1 prosentpoeng, eller 30 øre, frå vårt krav, seier LO-leiar Peggy Hessen Følsvik i ei pressemelding.

- Vi er ikkje dei som tek tusenvis av menneske ut i streik for 30 øre. Dette er ei løysing som sikrar god lønsvekst for dei lågast løna, legg ho til.