Straumstøtte til frivilligheita: – Bra at dei har kome i gang
Øystein Skaala i Rosendalstiftinga er glad for at regjeringa no får på plass ein krisepakke også til frivilligheita. Samstundes håper han at denne pakken berre er fyrste steg på vegen mot ei langsiktig og berekraftig løysing.
Publisert
Vinterens høge straumprisar har ført til ein kraftig auke i kostnadar for fleire av landets idrettslag og frivillige organisasjonar. Steinparken i Rosendal opplevde ei tre- til firedobling i energikostnadane sine. Primus motor i Steinparken, Øystein Skaala, har denne vinteren tala frivilligheita si sak oppi alt dette, og skreiv tidleg i januar eit brev til Finansdepartementet og Kulturdepartementet der han bad om at frivillige organisasjonar også måtte bli inkluderte i regjeringa sine straumkrisepakkar.
Framleis høge kostnadar
Annonse
Tysdag kveld vart han høyrt. Då kunne nemleg kulturminister Anette Trettebergstuen (Ap) fortelja at regjeringa no opprettar ein eigen straumpakke for idrettslag og andre frivillige organisasjonar, der dei vil dekka 80 prosent av straumutgiftene som går over 70 øre per kWt.
– Eg synest det er bra at dei no har kome i gang og har gjort dette. Dei høge straumprisane er eit problem som gjeld heile samfunnet vårt. Alt frå arbeidsplassar til hushald, idrett og frivilligheit vert råka. Så det har blitt eit gigantisk samfunnsproblem, som tydelegvis har kome uventa på myndigheitene, seier Skaala.
Fyrste steg
Men sjølv om regjeringa no vil inn og dekka 80 prosent av straumutgiftene som går over 70 øre per kWt, så vil kostnaden framleis vera vesentleg større enn tidlegare for dei fleste lag og organisasjonar.
Annonse
– Det er veldig bra at dei no har fått dette til. Når det er sagt så er det jo sånn at vi framleis snakkar om tiltak som går på prisar over 70 øre per kilowattime. Nøyaktig korleis pakken vil slå ut, det veit vi ikkje endå. Det må vi sjå når rekningane for januar og februar dukkar opp, seier Skaala.
– Dette er eit akuttiltak. Problemet har opphav i frisleppet av straumsal, og vil koma tilbake med ujamne mellomrom, noko som vil skapa uro og bekymring for frivillige organisasjonar, hushald og næringsliv. Desse krisepakkane må vi sjå på som eit fyrste steg i eit langsiktig arbeid for å få kontroll på omsetnaden av straum. Her må det langt meir gjennomgripande tiltak til for å få dette inn i eit berekraftig spor, held Skaala fram.
