Straumbrot i Gjetingsdalen og Ænes – BKK forklarar

Ein engasjert lesar har meldt frå til Grenda om hyppige straumbrot i Gjetingsdalen og Ænes dei siste vekene, og undra om det har noko å gjera med påkopling av straum i Krokatunellen.

Lesaren fortel at dei har opplevd fleire straumbrot etter at det kom straum i Krokatunellen. Men kommunikasjonssjef i BKK Kristina Kollerud Austrheim, avviser at det er nokon samanheng her.

– Den siste månaden har me dessverre hatt tre straumbrot – 6. januar, 10. januar og 13. januar. Årsaka til brota har vore øydelagde avleiarar på linja i uheldigvis to omgangar, den 6. januar og deretter den 13. januar, skriv Austrheim i ein e-post til Grenda.

Avleiarane er fiksa

Ho forklarar også at den 10. januar var årsaka til straumbrotet ein såkalla forbigåande feil.

– Det betyr at straumlinjene kjem borti kvarandre, for eksempel grunna vind eller snø som fell frå linja. Då oppstår det eit straumbrot.

Systema til BKK viser at dei fleste kundane fekk att straumen etter om lag 20-30 minutt, men at nokon måtte dessverre venta mellom tre og fem timar før straumen var tilbake.

– Me har full forståing for at det er både krevjande og frustrerande for kundane våre, og gjer vårt beste for å både forhindra og retta feil raskt. Begge feila med avleiarar i området er no fiksa, og eg må berre beklaga dei ulempene dette har medført, skriv BKK sin kommunikasjonssef, før ho legg til:

– Når det gjeld hypotesen om at opning/tilkopling av tunnelen som opna i fjor er årsak eller har medført auke i straumbrot, så er det noko eg kan avkrefta.