Strandrydding, bading, sol og sjokolade
Torsdag var det aksjonsdag for strandrydding i prosjektet Rein Hardangerfjord, og folk var ute og plukka bos over heile kommunen.
– Me har funne sjokoladepapir og plast og koppar og papir, oppsummerer ungane frå FUS Rosendal når me møter dei, ikkje langt frå kyrkja.
Dei er ein av mange flokkar som var ute og rydda på torsdag. Linda Hjelmeland er kommunekontakt for prosjektet Rein Hardangerfjord i stiftinga Framtidshavet. Ho syter for at alle får hanskar og sekkar å rydda i, og at alt boset vert henta og levert. Hjelmeland har oversikt over kor mange som var ute og rydda.
Annonse
Kvinnherad toppa lista
– Her blir det rydda i nær sagt alle bygdene i dag, og folk er kjempeflinke. Me fekk ein pangstart i 2022, då Framtidshavet sette hovudfokuset her i ytre del av Hardangerfjorden. Då trur eg folk vart veldig motiverte for å rydda, fortel ho.
Hjelmeland meiner denne motivasjonen heldt seg til 2023, då Kvinnherad toppa lista over effektiv rydding.
– Kvinnherad leverte inn 2 tonn bos i 2023, og det er nokså utruleg når ein ser at nestemann på lista leverte 1,6 tonn, og resten av kommunane låg på omtrent eit halvt tonn, fortel Hjelmeland.
Annonse
No gjeld det å sjå om kvinnheringane held fram med den gode jobben. Men skal ein tru barnehagestyrar i FUS Rosendal, Marit Skåla, er det ikkje sikkert me får inn like store mengder i år.
– Me ser at mengdene av bos har minka, fordi me har rydda så mykje før. Det er ikkje så mykje igjen langs strendene. Me valde å rydda meir oppi lia, for boset der fyk jo uansett ned mot fjorden om det får bli liggande.
Mindre bos i år
Barnehageflokken frå FUS Rosendal er tydeleg opplyste om kvifor det er viktig å plukka bos:
– Fordi elles kan duo eta det, og bli død og sjuk, forklarar Liva ivrig.
– Og nokon trur at plasten berre forsvinn, men den gjer ikkje det, seier Elra.
Annonse
– Skulen er også ute og ryddar, fortset ho, og det har ho jammen rett i.
På ein biltur mellom Uskedalen og Rosendal fann me elevar frå tre ulike skular som gjorde ein flott innsats for nærmiljøet og ein rein fjord. Ein gjeng elevar vart observert då dei like godt hoppa i sjøen og tok eit bad under ryddinga. Lærar Aslaug Hjelmeland ved Malmanger skule hadde med seg første og sjette klasse ut på tur i solskinet.
– Sjetteklassingane er fadrar for førsteklassingane, så dei har plukka bos ilag. Det var mindre bos enn før om åra, så kvinnheringane har gjort ein god innsats, kan ho rapportera.
