Strand-Ulv blir kommunens første idrettslag som satsar på e-sport

– Bakgrunnen er ein kombinasjon av at vi har lyst å prøva å få til nokon andre aktivitetar enn dei klassiske idrettane, i tillegg så veit vi at det er mange ungdomar her som held på med gaming. Difor vil vi få opp eit e-sportlokale kor desse kan samlast, seier leiar Bjørn Henning Nepstad i Strand-Ulv.

Like over nyttår

Satsingar er heilt i tråd med Vestland fylke sitt ynskje om ei breiare satsing på e-sportmiljøet i fylket. Fylkestinget i Vestland vedtok i desember i fjor at det skulle lagast ein eigen strategi for e-sport i Vestland med eit utgangspunkt i å sjå på kva fylkeskommunen kunne gjera for å styrka denne satsinga rundt om i distriktet.

Sidan då har fleire lag kasta seg med, og mange av dei største idrettslaga i landet har no ei eiga undergruppe for e-sport. Nøyaktig korleis satsinga til Strand-Ulv vert er framleis ikkje spikra, men dei går i alle fall i gang med bygginga av rommet like over nyttår.

– Vi hadde eit positivt møte med kommunen førre veke for å få godkjent det arbeidet vi har planar om å gjera. Vi har tenkt å dela scenen i gymsalen på langs og etablera e-sportrommet oppe på scena. På den måten blir rommet ein del av skulen, og eit rom skulen også kan nytta seg av, seier Nepstad.

Ein del av skulen

Då er tanken at rommet, som skal få seks topputstyrte pc-ar og to Playstation-konsollar med tilhøyrande storskjermar, også kan nyttast som ein del av heildagsskuleprosjektet på Hatlestrand.

– Då får skulen tilgang til seks relativt gode pc-ar, som dei ikkje har i dag, seier han.

I tillegg får ungdom i bygda, som kanskje ikkje er så interessert i volleyball eller fotball, eit tilbod på fritida.

– Vi vil prøva å skapa aktivitet for fleire. Og vi ser at vi har nokon ungdomar som ikkje har noko tilbod i dag, som gjennom e-sporten kanskje kan få det. Eg har sjølv to ungar, på 10 og 14 år, og det er jo speling det går i. Det er sånn det har blitt, så kan vi meina kva vi vil om det, seier Nepstad.

Idrettslaget fekk ein flying start då dei vart tildelt 300.000 kroner til etableringa av e-sportrommet av Sparebank 1-stiftinga Kvinnherad.

– Litt av desse pengane skal gå til ombygginga av skulen, mens resten vil gå til innkjøp av utstyr. Vi har sendt ut førespurnadar på pakkeprisar, og vil like over nyttår gå i gang med dugnadsarbeidet på sjølve bygginga av rommet. Så får vi sjå det litt an kor aktivt det blir, det er i alle fall ein moglegheit at e-sport vert ei undergrein i idrettslaget, seier leiaren.