Strålande nøgde etter skutefesten – satsar på ny fest i 2023
Skutefesten til «Gurine» vart ein folkefest, og suksess for dei involverte.
Publisert
– Ein vert litt utsleten etterpå, men du verda så kjekt! Hamna var full med fartøy allereie fredag føremiddag, og laurdag var det heilt fullt med folk også, smiler Per Ivar Ingebrigtsen etter at skutefesten er losa vel i hamn.
– Rike og kjekke år
Annonse
Festen byrja på mange måtar roleg fredag kveld, med musikk i teltet på Skålakaien. Laurdagen starta med at båtbyggjaren Kristian Djupevåg fortalte om sitt arbeid med å restaurera galeasen «Gurine», eit arbeid han var hyrt inn for å leia frå 2012 av. Han fylte auditoriet i Folgefonnsenteret til siste sete, og snakka med innleving om både synet som møtte han første gongen han kvilte auge på skuta, og arbeidet fram til der ho er i dag.
– På det første møtet gjekk eg ein tur rundt båten, og tenkte «kva er det dei har gitt seg ut på». Men eg vil livprisa desse galningane som fekk tak i «Gurine», og fekk ho på land. Det var rike og kjekke år eg fekk vera med på, sa 75-åringen.
Etter føredraget kunne publikummet gå ut på kaien og sjå at det allereie hadde fylt seg opp med langt fleire nyfikne. Føredrag og musikk gjekk hand i hand med matsal og servering. «Gurine», saman med fleire av dei andre trebåtane, låg på utstilling og trekte skodelystne vitjande om bord. Kvinnherad Kystlag viste seg fram, og fyrte opp eit par båtmotorarar for som trekkplaster.
– Strålande nøgde
Annonse
– Me er veldig nøgde med gjennomføringa, og føler det vart ein stor suksess. Publikum var glade og takksame, både lokale og tilreisande. Det var i underkant av 20 påmeldte båtar, som saman med alle fritidsbåtane som kom og var interesserte laga ei flott ramme for skutefesten, fortel Ingebrigtsen.
– Me føler at me har fått litt inntekter på denne innsatsen, pluss at me får gjort litt merkevarebygging for «Gurine», og samtidig gitt noko tilbake til lokalmiljøet. Me fylte dei 199 plassane teltet, og det var akkurat passe, smiler han etter helga.
Det har kravd mykje dugnadsinnsats å koma i mål med Skutefesten.
– Heile Gurine-gjengen har vore i sving. Vaktar, servering, mottak av båtar, og til og med nattevakter. 10-15 personar på rigging opp og ned, pluss 15 på matlaging, servering og omvising. Det var definitivt kjekt, og me vil prøva å gjera dette til neste år også, sluttar Ingebrigtsen.
