Strålande nøgd med gjennomføringa av konferansen

– Heilt fantastisk! Det har vore eit eventyr, ein konferanse som gjekk akkurat som eg hadde håpa. Det skulle vera kunnskap og lærdom å henta, og det har eg fått tilbakemeldingar om at det har vore, svarer Frode Hetlevik på spørsmål om korleis årets konferanse har vore.

Leiaren for Kvinnherad Næringsservice tykkjer dei hadde fantastiske føredragshaldarar og ein flink konferansier i Arild Sondre Sekse.

– Det var 174 påmeldte i salen her, men det burde vore det doble. Dei som ikkje var her denne gongen har gått glipp av mykje, meiner næringslosen.

Onsdag kveld var det delt ut to prisar. Bra Lunsj vart kåra til årets gründerbedrift, basert på veksten og grünerånda som ligg bak, der Mary Jannes Reinsholdsservice og Kloster Laks var dei to andre nominerte i kategorien.

Årets bedrift vart S. Rødsten Bilforretning basert på stor vekst og gode resultat dei siste tre åra, med Halsnøy Dokk og Petol tok resten av pallplassane i den kategorien.

Tema for årets konferanse var framtidas kraftkjelde. Undervegs i konferansen vart både dilemma og vegval for framtida omtala frå scenen.

– Etter at klimaministeren hadde tala på til oss på videolink, etterlyste eg handlekraft for kva me skal gjera framover. Alt har ein samanheng, og me må bestemma oss for kva veg me skal gå framover, for om nokre få år har me har ikkje kraft til arbeidsplassane våre om me ikkje blir samde om korleis me skal prioritera, sluttar Hetlevik.