Straffa strengt etter tjuvfiske

To personar måtte i november møta i retten tiltalt for ulovleg garnfiske i utløpet av elva i Rosendal.

Grenda har tidlegare skrive om dei to kvinnheringane i 50- og 60-årsalderen som var tiltalt for grovt å ha brote Lakse- og innlandsfisklova § 49 sitt forbod om garnfiske i 100-metersona frå elvemunninga.

Hendinga skjedde i sommar, og dei to hadde sett ut fem garn på totalt 172 meter i overflata av sjøen, eller medverka til dette. Garna hadde ein maskestorleik på mellom 52 og 65 mm. På garna blei det fanga totalt fire sjøaure, tre humrar og samla sett rundt ti marine artar, stod det mellom anna i tiltalen.

Dyrt

Dommen blei avsagt i Sunnhordland Tingrett i november, og den enda mellom anna med bot for dei to fiskarane.

Anadrom laksefisk er ikkje som art totalfreda, men laksefisk som er fredingssona på veg til Rosendalselvene er i realiteten totalfreda, då all fiske på anadrom laksefisk er forbode året rundt i fredingssona, står det mellom anna i rettsdokumentet.

Personen i 60-åra er dømt til 30 dagar i fengsel på vilkår, medan for personen i 50-åra var denne straffa sett til 24 dagar.

Begge må betala kvar si bot på 10.000 kroner. Vidare mistar òg begge retten til å fiska med garn i tre år. Personen i 60-åra får samstundes fem fiskegarn drege inn.

I tillegg til fiskeutstyret, blei det også lagt ned påstand om inndraging av ein båt, men det blei konkludert med at dette var uforhaldsmessig, mellom anna fordi båten hadde fleire formål for dei tiltalte.