– Støttar streiken fullt ut

Industri Energi har sidan måndag 15. august hatt over 1400 medlemmar i streik. Mellom anna har 255 medlemmar ved Boliden i Odda. Streiken er ei følgje av brot på meklinga i samband med sentrale lønsforhandlingar.

Tilsette ved Hydro Husnes er førebels ikkje tatt ut i streik, og blir det kanskje ikkje heller, men onsdag var fagforeininga ved Hydro Husnes på plass i Odda for å markera sin støtte til streiken i nabokommunen.

– Husnes kjemiske stiller med si fane ved Boliden i dag for å vise si støtte der, fortel leiar for Husnes Kjemiske Fagforening Ørjan Normann til Grenda.

Han legg til at dei støttar streiken fullt ut.

Kan råka Hydro Husnes

Industri-streiken vil trappast opp med ytterlegare 1115 medlemmar førstkomande måndag, mellom anna frå Alcoa Mosjøen og Hydro Aluminium Sunndal. Desse verksemdene var blant dei som fekk varsel om plassfråtreding tysdag 16. august.

Grunna plassoppseiinga av 5. august kan også tilsette ved Hydro Husnes kome til å få denne beskjeden. Det er forbundsleiinga som vurderer uttaket.

– På Husnes har vi alltid hatt eit godt samarbeid og klima med leiinga, og vi har avklarte einigheitsprotokollar og nedkjøringsplanar for korleis vi skal gå fram dersom vi endar opp med å gå til streik, seier han, før han legg til at alle skal kjenna seg trygge.

– Vi vil ha lokal sanksjonsrett ved usemje i lønsforhandlingar. Det er allereie bedrifter innan den elektrokjemiske overeinskomsten som har denne retten, og vi er overraska over at det vart brot i meklinga. Det betyr at det er forskjellsbehandling i Norsk Industri, held Normann fram.

Brot på forhandlingane

Han meiner det ville vore i Norsk Industri si interesse å styrka dei lokale forhandlingane, kor Industri Energi står som motpart.

Men etter 54 timar med forhandlingar hjå Riksmeklaren, kor 18 av dei var på overtid, vart det brot på forhandlingane. Følgjeleg vart meir enn 1400 medlemmar teken ut i streik.

– Vi har dyktige foreiningar lokalt som tek ansvar i dårlege tider. Der er Hydro Husnes, tidlegare Sør-Norge Aluminium, eit godt døme, meiner Normann, og forklarer:

– Dei var samstemte då det vart avgjort at ingen skulle ta ut lønsauke medan det gjekk dårleg for verket. Men når dei kan syna til gode avgjersler i nedgangstider, ynskjer dei også å ha sanksjonsrett til å gjera lokale vurderingar i tider med medgang.

Fire dagars varsel

– Plassfråtredinga for verka i Mosjøen og Sunndal kom i går, og vil såleis gjelda frå måndag morgon. Dei resterande bedriftene som har motteke plassoppseiing kan òg motta varsel om plassfråtreding. Dersom Hydro Husnes blir teke ut, må det gå minimum fire dagar før streiken startar, forklarar leiaren for Husnes Kjemiske Fagforening.

Normann avsluttar med å understreka at det gode samarbeidsklimaet skal bestå uansett om Hydro Husnes blir berørt av streiken eller ei.