Støttar filminnspeling på Halsnøy
Planane om å laga film om Moritz Rabinowitz får økonomisk støtte frå Kvinnherad kommune.
Publisert
Som Grenda nyleg skreiv om, planlegg filmprodusent og manusforfattar Maria Lavelle frå Haugesund å laga ein kortfilm – og seinare mogleg serie – om Moritz Rabinowitz. I 2022 er det 80 år siden Rabinowitz og familien vart deportert og drept av nazistane. Han låg i skjul på øya Toftekalven utanfor Halsnøy då han vart arrestert av Gestapo. Produsenten sitt ynske er å spela inn filmen på faktiske lokasjonar i Haugesund, Skånevik og Toftekalven.
Det var Leif Sverre Enes (H) som løfta saka til handsaming i formannskapet.
Annonse
– Det kunne gjerne vore interessant for Kvinnherad kommune å bidra viss administrasjonen finn pengar til det, sa han.
Ove Lemicka (Frp) var samd, og føreslo å løyva 50.000 kroner. Men han ville stilla eit par vilkår.
– Det er ei forferdeleg historie som har historisk betydning. Men ein føresetnad for å gje tilskot, er at opptaka om Toftekalven vert gjort i Kvinnherad, og at det ikkje blir noko «fake» som vi betalar for. Det må også vera eit krav at Haugesund kommune stiller med økonomisk støtte, sa han.
Både summen og vilkåra vart samrøystes vedtekne.
