– Støtta frå kommunen haldt bedrifta flytande
Andreas Fjellandsbø (30) frå Kaldestad opplevde mange avlysingar og utryggleik for bedrifta Ekspedisjonsreiser under pandemien. Grunna den kommunale koronastøtta kan han no sjå framover.
Publisert
Sist oppdatert
– For denne bransjen kom pandemien som eit sjokk. Sjølv om det er mykje pengar i reiseliv, er det også stor risiko, forklarar Andreas Fjellandsbø, som starta opp reiseselskapet i 2017.
Han takkar mellom anna Ove Lemicka for støtta selskapet fekk under pandemien. Og gjennom støtteordningane til kommunen, som førte til utbetalingar på nær 150.000 kroner samanlagt, klarte han å unngå konkurs.
Annonse
– Men Ekspedisjonsreiser har gått med enormt tap. Det var eit millionbeløp som forsvann med pandemien, medgir Fjellandsbø vidare.
Folk er gira på å reise
Som følgje av dette tok han på seg ein ekstrajobb, og tok dessutan opp lån for å kunne betala kundane tilbake for avlyste reiser. Når Russland invaderte Ukraina, gjekk også den planlagte ekspedisjonen til Russland ut.
– Slikt kan ein jo berre ikkje planlegga for, kommenterer 30-åringen.
Annonse
Og endeleg går verksemda så det susar igjen.
– Eller eg jobbar iallfall så det susar. Folk er tydeleg gira på å reise igjen, og det ser ut til at fleire vel vekk charterreiser for andre typar opplevingar, held han fram, før han sluttar av:
– Det er så mykje å gjera no at det kan sjå ut til at må eg tilsetja nokon på fulltid til nyttår. Eg håpar iallfall det!
