Stortingsval med digitale løysingar og smittevern

Det er fleire omstende som vedkjem årets val, som er lagt til 12. og 13. september. Grunna pandemien vert det stilt strenge krav til smittevern, valkortet blir i år digitalt og gjennomføringa i Kvinnherad skjer for første gong utan tidlegare valgeneral Geir Mogren. Sistnemnde punkt skal vonleg ikkje påverka den praktiske gjennomføringa av valet, men dei to første momenta vil truleg kunne merkast.

Valkortet blir digitalt

– Nytt for året er at valet skjer under ein pandemi og at valkortet er digitalt. Vi vil likevel presisere at ein ikkje treng valkortet for å få røysta, det som er viktig er at ein må kunne legitimere seg når ein kjem, informerte Næs.

At valkortet blir digitalt tyder at alle som har smarttelefon vil ha dette tilgjengeleg. Dei som har reservert seg for digital kommunikasjon frå det offentlege, eller som ikkje har nytta seg av ID-porten dei siste 18 månadane, vil få valkortet tilsendt på papir. Dersom ein har med seg valkortet når ein skal røyste, vil dette vera tidssparande.

Diskuterer drive-in røysting for folk i karantene

Grunna smittevernomsyn vil den praktiske gjennomføringa av valet krevja meir ressursar i forhold til tid og logistikk. Difor er det ønskjeleg at veljarane har med valkortet, då det kan bidra til å unngå opphoping av folk i vallokala. Sist val erfarte dei tendensar til kø, særleg på Husnes, og det blir i år lagt til rette for å i større grad unngå dette, mellom anna med auka bemanning og med fleire røystebåsar.

Vidare understreka Høyland og Næs at valet skal gjennomførast, og i tråd med dei nasjonale retningslinjene vil det bli lagt til rette for at alle skal få avlagt stemme.

– Vi diskuterer ulike løysingar, slik at sjølv dei som er i isolasjon eller karantene vil få høve til å stemme. Det vil krevja at vi kanskje må rykke ut og oppsøke folk der dei er. Dersom nokon ser at dei ikkje får avlevert stemme, kan dei kontakta kommunen så seint som fredag 10.september klokka 10, så vil vi organisere det slik at dei får stemt.

For å imøtekoma slike utfordringar er eksempelvis drive-in røysting aktuelt. For røyste-situasjonar som krev fullt smittevernutstyr vert eit samarbeid med helsepersonell diskutert. Kommunen er pålagt å legge til rette for at ingen skal vera hindra i å stemme, noko dei tek på største alvor.

Oppmodar til førehandsrøysting

Det vert opna for tidlegrøysting 1.juli. Dei som ønskjer eller må nytta seg av dette tilbodet må møte på rådhuset, og røystesetlane vil ikkje gi moglegheit til å rangere eller stryke kandidatar. For å tidlegrøysta skal ein kontakta rådhuset på førehand, og dette tilbodet er ope fram til 9.august.

10.august tek førehandsrøystinga til. Ved sist val var det 41% som førehandsrøysta i Kvinnherad, og trenden er aukande. I år oppmodar kommunen altså dei som kan å førehandsrøysta, slik at presset på valdagane vert minst mogleg. Både Høyland og Næs vil sjølv gå føre som prakteksempel for desse veljarane med å førehandsrøysta. Førehandsrøysting er mogleg fram til fredagen før valet.

– Noko anna har me ikkje tid til, smiler dei.

Som ein del av førehandsrøystinga vert det også lagt opp til ambulerande røysting, kor kommunen reiser ut til bygdene og helseinstitusjonane i kommunen. Planen for kva tid det vert høve å stemme i si eiga bygd eller ved sin næraste helseinstitusjon ligg på kommunen si nettside, og vil verta oppdatert fram mot valet. Slik det er planlagt i dag, vil den ambulerande røystinga starta i slutten av august, og finna stad rundt om i bygdene og på institusjonane i dei påfølgjande dagane.

På framsida til Kvinnherad kommune sin nettstad ligg det ein grøn knapp som heiter «Val 2021». På denne sida vil kommunen legge ut oppdatert informasjon i tida fram mot valet.