Stort statsrådmøte i Rosendal torsdag og fredag
Statsrådar frå Norge, Sverige, Danmark, Finland og Island skal dei neste par dagane vera samla til diskusjonar på Rosendal Fjordhotel. Tema vert mellom anna innvandring og grensekontroll.
Publisert
Sist oppdatert
Ikkje særleg overraskande er det Justis- og beredskapsminister Emilie Enger Mehl (Sp) som er vert for møtet. Tidlegare har ho sagt til Grenda at ho reknar Rosendal som heimstaden sin, så det kan nok henda at det er ho som har lansert bygda som møtestad.
Samlinga føregår torsdag og fredag denne veka. Til stades vert dei nordiske statsrådane som har ansvaret for migrasjon og innvandring, og dei skal diskutera ulike tema innanfor asyl- og migrasjonsfeltet. Det er i alt fem statsrådar som er inviterte.
Annonse
«Blant temaa som skal diskuterast, er korleis ein kan forhindra at personar som søkjer visum i et nordisk land, misbruker visuminstituttet for å søkja om beskyttelse. Det vil også blant anna vera diskusjonar om korleis ein kan fremja returar og samarbeid med land om retur av eigne borgarar», står det i presseinvitasjonen.
Ukraina
Kommunikasjonsrådgjevar Andreas Bjørklund seier til Grenda at andre tema blir felles utfordringar knytt til personar frå Ukraina som søkjer beskyttelse, og felles handtering av grensekontroll.
Dei som stiller på møtet dannar i lag «Nordisk samrådsgruppe på høgt nivå for flyktningspørsmål», forkorta til NSHF. Dei har møte kvart år, arrangert av det nordiske landet som til ei kvar tid har formannskapet i NSHF.
