Stort fleirtal i fylket for å greia ut Sunnfast

Fylkespolitikarane gjekk imot fylkesdirektøren og gav klart uttrykk for at planlegginga av Sunnfast må halda fram.

Onsdag hadde fylket sitt hovudutval for samferdsel og mobilitet møte. Saka om Sunnfast stod eigentleg berre oppført som eit referert skriv, og det refererte skrivet var det som fylkesdirektøren sendte ut på førehand. Som Grenda skreiv i førre avis stilte han seg der sterkt skeptisk til prosjektet, både utifrå økonomiske og miljømessige årsaker.

Men tysdag ettermiddag mottok politikarane ein ny versjon av skrivet. Hovudtrekka er dei same, men mange av dei økonomiske utrekningane er fjerna, samt at punktet om å ta fram igjen tankane om nytt ferjesamband er tona ned. I møtet på onsdag vart det hevda at det fyrste notatet var uferdig og sendt ut ved ein feil.

Skapte stor usikkerheit

Per Jarle Valvatne (Ap) ynska å løfta notatet opp på saklista, slik at politikarane kunne gjera eit formelt vedtak. Dette vart vedteke med 13 mot 2 røyster. Ap la fram forslag om at fylket no skal be om møte med dei involverte kommunane for å gå gjennom notatet og deretter fortsetja planlegginga.

– Det vert opplyst at det fyrste notatet var eit uferdig framlegg, men det har skapt stor usikkerheit om ein kan få utgreia prosjektet ferdig, sa Valvatne.

Han tykte dessutan at innspelet om å sjå på ferjesambandet på nytt, minna om ei ørkenvandring.

– Det har vi prøvd i mange rundar tidlegare, og på Stord har dei fleste partia sagt at det er lite aktuelt å byggja nye ferjeleie. Det er difor viktig å få utgreidd Sunnfast-prosjektet så godt som mogleg, konkluderte han.

Sigbjørn Framnes (Frp) var heilt samd, og understreka at Sunnfast er eit viktig prosjekt for Sunnhordland.

– Eg vart litt sjokkert over det fyrste notatet. Det verka litt historielaust, fortalde han, og sa seg uroa over at skrivet har vore ein del av saksgangen i administrasjonen.

– Vi er nøydde for å sitja frampå i stolen. Skal vi bli ein del av det grøne skiftet, så må vi satsa på gode infrastrukturprosjekt. Eg heiar difor på alle vegprosjekt. For meg er ikkje ferjer nostalgi, for meg er ferjer eit nødvendig vonde, meldte Framnes.

Uhaldbar situasjon

Silja Bjørkly (H) hevda ho sette kaffien i halsen då ho las det opphavlege notatet. Ho sa seg også veldig ueinig i talmaterialet som dokumentet bygde på.

– Vi er heller ikkje heilt beroliga av det nye notatet. Det fyrste skrivet er eit signal om at det føreligg slike tankar i administrasjonen, meinte ho.

Mette Heidi Ekrheim (Sp) tykkjer Sunnfast er eit viktig prosjekt for å binda Sunnhordland betre saman.

– Vi veit alle at Kvinnherad har ein uhaldbar situasjon når det gjeld ferjesambandet. Vi veit òg at den ferjeturen er ein halvtime lenger enn han treng vera, sa ho.

Ekrheim var elles krystallklar på at Hordfast, som Sunnfast truleg er avhengig av, vil bli realisert.

Startar i feil ende

SV og MDG var ikkje samde med resten av utvalet, og la fram eit alternativt forslag som var kritisk til Sunnfast. Mellom anna argumenterte dei med at Sunnfast si avhengigheit av Hordfast er nok til å vera imot. Dei la òg vekt på miljøkonsekvensane. Mona Høgli (MDG) meinte saka er snudd på hovudet når ein diskuterer finansiering og økonomi fyrst.

– Då startar ein i feil ende. Kva med naturrekneskapen? Dette er ikkje å ta naturkrisa på alvor, sa ho, og understreka at det ikkje finst ein samrøystes politisk vilje til å byggja Sunnfast.

Marthe Hammer (SV) la til at det er feil å knyta seg opp mot Hordfast, og ville heller prioritera rassikringsprosjekt.

Forslaget om å ha møte med kommunane og fortsetja prosessen vart vedteke med 13 mot 2 røyster.

– Vi skal ikkje ta stilling til noko som helst i dag, men syta for at prosessen kjem inn på eit godt spor, kommenterte Arve Helle (Ap).