Storslått feiring av sprek 90-åring

Bygdefolk, venner og familie strøymde til Helgheim for å vera med på den storslegne feiringa av Bjørgulv Eik. Det er eit godt teikn på at den aktive lagsmannen spreiar glede i bygda og omland. At denne mannen er ein vital 90-åring, er i alle fall sikkert.

Etter at Grenda dukka opp tok det ikkje lange tida før dottera Kjellrun Eik plinga i glaset for å ynska alle velkommen, for å så seia nokre ord om jubilanten.

– Denne festen har me sett fram i mot i heile haust. Me fann tidleg ut at me hadde lyst å gjera stas på far vår, og feira 90 års-dagen på skikkeleg vis. Jubilanten har berre vore med frå sidelinja av planlegginga, for slik er det når han har sett tre jenter til verda. Heldige er me som har han, og det er svært kjekt at så mange ynska å dela denne kvelden med oss, sa Kjellrun på vegner av døtrene som stod bak den storslåtte feiringa.

Jubilanten i hovudrolla

Ein stødig Kristian Bringedal leia gjestene gjennom eit rikhaldig program, der jubilanten sjølv hadde fleire roller. Han og resten av amatørgruppa i Uskedal ungdomslag har nemleg møttest kvar måndag i to månadar for å øve inn «Dreng som duger» i to akter av Jørgen Vikør. Eit teaterstykke amatørgruppa har framført fleire gongar før, men for nettopp denne storhendinga gjekk Bjørgulv inn og tok hovudrolla som den morosame drengen med mange påfunn og kjappe replikkar.

Bjørgulv har hatt mange roller i ulike spelstykke i ungdomslaget, men sist gong «Dreng som duger» vart framsynt hadde Bjørgulv rolla som løytnant, og no som dreng - noko han meistra på eit imponerande vis. 90-åringen og resten av amatørgruppa fekk latteren til å breia seg i salen gjennom begge aktene.

Flotte, kulturelle innslag

Vidare fekk gjestene høyra flotte tonar av Røysterett for alle, som skapte både ei rørande og festleg stemning. Deretter entra Uskedal Musikklag scena, der jubilanten sjølv var med og spelte kornett.

På vegner av Uskedal Musikklag tok Thor Inge Døssland gjestene med på ei kort reise gjennom speleåra til Bjørgulv.

– Dette er verkeleg ein stor dag. Bjørgulv har vore aktiv blåsemusikar i heile 74 år. Og ikkje nok med det, han spelar det minste munnstykket me har. Kva er den kjeften til Bjørgulv laga av tru? Og kornetten, den spelar han betre enn nokon gong. Denne mannen har vore med på alle julegrantenningane i Uskedalen, og i år tenner me den for 60. gong, sa Døssland til stor applaus frå dei frammøtte.

Dei beskreiv Bjørgulv som ein allsidig mann som alltid har vore oppteken av drifta av musikklaget og lagslivet generelt.

– Bjørgulv er gull verdt for oss. Han har drive musikklaget framover, og me er utruleg glade for å få ha han med oss. Han kjem stadig med gode replikkar, og skapar alltid god stemning. Bjørgulv er ein mann me set stor pris på.

Det er ikkje utan grunn at han i 1987 vann kulturprisen.

– Bjørgulv har hatt mange viktige roller og funksjonar i bygda, til dømes i frivillig ungdomsarbeid, musikk, kyrkje, friluftsliv, friluftslag og idrett, for å nemna noko. Han har også vore aktiv i Sunnhordland folkehøgskule, både i elevsamfunnet og elles. Han er ein svært likande kar, som balanserer fint alle typar miljø. Rolla han spelte i kveld passa han veldig godt. Drengen ordnar opp, hjelper og finn løysingar, og det er nettopp slik Bjørgulv er, fortalde konferansier Kristian Bringedal.

- Dette var stas

Jubilanten smilte frå øyra til øyra kvelden gjennom, og det var tydeleg at han var glad for alle dei fine orda og musikken som vart servert innimellom talane, samt kronene som vart gjeve til Uskedal Ungdomslag.

– Dette var stas. Ja, eg må seia det at eg er heldig. Og det å få spela teaterstykket igjen var veldig kjekt. Det gjekk i grunn fint, trass i at me berre har øvd i knappe to månadar, og at eg har måtta setja meg inn i ei heilt ny rolle. Nei, denne kvelden har vore fantastisk, smilte han.

Døtrene var minst like nøgde med jubileumsfesten, men ikkje overraska over den store tilstrøyminga av bygdefolk, venner og familie.

– Når me først skal feira ein slik mann, må det jo gjerast skikkeleg. Me var sjølvsagt litt spente på førehand, men me håpte jo at det var mange som ynska å dela denne kvelden saman med far. Han er godt likt av mange, så at det kom totalt 160 gjester er ikkje overraskande, smilte døtrene Kjellrun, Jofrid og Solbjørg Eik.

Etter denne bolken vart selskapet flytta ned i kjellaren, der gjestene fekk servert varm-mat av Halsnøy J15-laget, og talar og gode ord om den spreke jubilanten fortsette.