Storkoste seg på handballskule
32 ungar har fått utfalda seg med leik, moro og handball i Husneshallen dei to siste dagane.
Publisert
Tysdag og onsdag denne veka inviterte Kvinnherad handballklubb og Hydro Husnes til handballskule, tradisjon tru. Det er haustferie i skulen, og høvet blir nytta til å gje barn moglegheita til å bli kjend med eller trena ytterlegare på idretten.
Då Grenda vitja hallen på handballskulen sin fyrste dag var ungane på god fart ned i fruktfatet, før den siste timen skulle gå med til spel.
Annonse
– Gøy!
Sarah Brakestad Haugland (8), Markus Nånes Blokhus (9), begge frå Valen, og Julian Sundsteigen Hansen (9) frå Husnes tok seg tid til å fortelja litt om kva dei syntes om handballskulen så langt.
– Det har vore gøy! Me har lært oss litt triks, seier Markus.
Han går ikkje på handball sjølv, men vurderer å byrja.
Annonse
– Me har skote på mål, sendt pasningar til kvarandre, legg Julian til.
Sjølv om han stiller seg bak dei andre og meiner at handballskule er gøy, vurderer han at fritida ikkje strekk til for nok ein aktivitet.
– Eg går ikkje på handball og trur ikkje eg kan byrja heller. Eg går allereie på fleire andre aktivitetar; fotball, golf og svømming, seier han, og legg til:
– Men no er det ferie, så då kan eg spela handball.
Sarah er den einaste av dei tre som allereie går på handball.
– Så eg kan litt frå før. Men det har vore kjekt, smiler ho.
Annonse
Avslutta med spel
Før dei tre barna blir invitert inn att i hallen får dei spørsmål om kva dei skal bruka resten av ferien til. Sarah og Julian er ikkje sikre, men Markus har det heilt klart føre seg kva han skal gjera når handballskulen er ferdig:
– Eg skal koma opp i meisterligaen i Fortnite.
– Wow, det høyres ikkje så lett ut?
– Nei, det er ganske vanskeleg, slår han fast.
Janniche Haugland, som hadde hovudansvar for handballskulen, meinte den fyrste dagen hadde gått fint føre seg.
Annonse
– Det er 32 ungar som er her, og denne dagen har gått med til leik og moro, barna har blitt kjent med ballen og med handball. Det har gått kjempefint og det har iallfall sett ut som at dei har storkost seg, seier ho før deltakarane blir delt inn i lag, og får spele resten av tida.
