Storhending i Ølve – leverte to anlegg

Då vart nemleg to ferdige postsmoltanlegg av typen Egget løfta på lekter. Det eine var eit flunkande nytt E2000, det andre var den oppgraderte versjonen av pilotutgåva. Begge skal leverast til Gjermundnes i Romsdalsfjorden.

– Det har vore ein travel haust med å få ferdig desse to prosjekta. Vi er utruleg stolte over teamet vårt, som har klart å ferdigstilla begge prosjekta innanfor ein stram tidsplan, seier dagleg leiar Cato Lyngøy i Ovum AS, selskapet som eig Herde kompositt AS, til nettavisa Kyst.no.

Gjev ikkje opp

Lyngøy er også styreleiar i Herde kompositt. Han vedgår at trass i den viktige hendinga førre veke, er situasjonen alvorleg for Herde framover.

– Dessverre er ordreboka slunken framover, og permitteringsvarsel er sendt ut til over 50 av våre medarbeidarar, noko som har store negative ringverknader for lokalsamfunnet i Ølve. Hjå Ovum i Bergen har åtte dyktige medarbeidarar fått oppseiing. Men vi gjev ikkje opp, og er fullstendig overtydde om at for at næringa skal veksa, må vi ha flytande lukka teknologi som eit alternativ på mange lokalitetar, for å kunna ta betre vare på laksen, opplyser Cato Lyngøy.

Når det gjeld vegen vidare for Ovum og Herde kompositt, seier Lyngøy at sistnemnde jobbar svært aktivt med å få inn andre typar oppdrag.

– Vi opplever at mange ynskjer å hjelpa oss og kjem med aktuelle jobbar, eller tilbod om innleige av personell. Her har det tette samarbeidet med fagforeiningane vore avgjerande. Men så langt er ingen ting materialisert i signerte kontraktar, fortel Lyngøy til Kyst.no.

Snuoperasjon

Han slår dessutan fast at Herde er ei lovande bedrift med mykje kompetanse.

– Den prøver vi å ta vare på, samstundes som vi gjennomfører ein «snuoperasjon» og etablerer fleire bein å stå på. Vi har hatt rikeleg å gjera med egg-oppdraga fram til no, men framover er det altså rimeleg tørt, kommenterer styreleiaren.

Egg nummer to har same storleiken som piloten; det vil seia 2000 m3, 21 meters høgde og 15 meters breidde.

– Dei gode biologiske resultata frå dei fyrste fiskeproduksjonane, saman med over 150 systematiserte læringspunkt, gjev oss eit solid fundament inn i oppskaleringa til 20.000 m3. No har vi også tatt kostnaden med å ta piloten på land. Dette gjev god innsikt og risikoreduksjon for vår teknologi og for kundane i neste runde, analyserer Cato Lyngøy.