Storfangst av fersken

Truleg finst det eit og anna ferskentre rundt omkring i Kvinnherad. Ved eine husveggen hjå Marie Eik Nygård står eit eksemplar som no har sin beste sesong hittil.

– Det står nesten berre på grunnen, det er ikkje mykje jord, seier Marie, som bur på Landa i Omvikdalen.

Men mangelen på jord ser ikkje ut til å vera noko problem, for treet er så fullt av fersken at det er så vidt greinene maktar vekta.

– Eg talde sånn nokolunde ein dag, og fann ut at det var rundt 70-75 fersken. Det er fyrste gongen det er så mykje, rekorden frå før er 33 for nokre år sidan. Til vanleg har det berre vore fire-fem, fortel Marie.

– Kvifor er det så mange i år?

– Det har eg ikkje noko forklaring på. Kanskje det har med året år gjera, for det er også mykje plommer og andre frukter. Treet får litt gjødsel, elles har eg ikkje gjort noko ekstra. Eg er berre glad det kjem noko opp, og synest det er spesielt at det er så mykje i år, analyserer ho.

20 år

Treet er om lag 20 år gamalt, og vart då gjeve som fødselsdagspresang til mannen Alf Ragnar. Sistnemnde har sjølvsagt prøvesmakt.

– Eg har ete to stykke, og dei var det skikkeleg smak på, smiler han.

Akkurat då Grenda var på besøk, var fruktene litt harde, men det var nok ikkje mange dagane til at dei fleste kunne serverast.