Store summar frå Malmanger skule
På oversikta over Kvinnherad sine største gjevarar til TV-aksjonen, ligg Malmanger skule på ein andreplass, ikkje så mange kroner under Hydro Husnes. Det tikkar framleis inn pengar, i skrivande stund har det kome inn 83 226,- kroner.
– Det er viktig for oss å seia at desse pengane kjem frå sponsorane våre, dei lokale bedriftene som sa ja til å bli med på å støtta løpet vårt. Me set stor pris på responsen, seier initiativtakar Hanne Hesjedal.
Det var i førre veke at Malmanger skule arrangerte skuleløp til inntekt for TV-aksjonen. Det var uventa mange rundar som vart sprunge og gått for barnekreftforeningen, i alt 828. Sponsorane har fulgt opp.
Annonse
Ville gje ei «gulrot» å springa etter
– Dei sponsorane eg har snakka med, er berre imponerte, og synest det er kjempekjekt at elevane sprang så mange rundar, seier Hesjedal.
BKS var hovudsponsor for løpet, og bidrog med 50 kroner for kvar runde som vart sprunge totalt, noko som gav ein gjevarsum på 41 400,- kroner. Rune Klette i BKS vart ikkje sjokkert av dei høge tala.
– Nei, me vart berre glade, for me håpa på så mange rundar som råd. Me ville at den femtilappen skulle vera ei god «gulrot» for ungane å springa etter. Pengane går til ei frykteleg god sak, og me er glade for å kunne bidra, seier han.
Annonse
Ein god lunsj
Hanne Hesjedal fortel at det blir ei lita feiring i samband med at skulen skal markera verdsdagen for psykisk helse ein dag denne veka.
– Då skal elevane få ein god lunsj. Me brukar nok denne lunsjen til å feira innsatsen deira i skuleløpet òg, seier Hesjedal.
No held skulen på med å laga ein takkeplakat til alle sponsorane. På spørsmål om det freistar å gjenta suksessen neste år, er læraren open for andre løysingar.
– Dette får me ta litt år for år. Det er ikkje sikkert at skuleløp skal vera ein ny tradisjon for Malmanger skule, til andre mottakarar er det kanskje andre aktivitetar som passar betre. Temaet i år var spesielt – det å springa for andre born gav meining, seier ho.
