– Store moglegheiter til å påverka

Det var stappfullt på Rosendal Fjordhotel tysdag kveld då NVE inviterte til folkemøte om den nye kraftleidningen. Stappfullt vil truleg seia ein stad mellom 250 og 300 personar.

– Vi vil høyra dykkar spørsmål, og vil gjerne vita kva de er opptekne av, sa Tor Carlsen frå NVE då han opna møtet.

– Viss de vil påverka prosessen, skriv høyringsuttale, understreka han.

Herman Lange Johnsen, seniorrådgjevar i NVE, slo fast at ein enno er tidleg i prosessen.

– NVE har inga eigarinteresse i saka. Vi er her for å gjera ei fagleg vurdering av det Statnett har meldt. Føremålet i dag er å finna ut kva kunnskapar vi treng vita meir om for å kunna gjera ei fagleg vurdering i neste fase. Det er ein lang prosess vi no er i starten av, fortalde han, og la til at høyringsfristen er 16. januar.

Teknisk levetid

Statnett stilte med tre personar; advokat Steinar Parelius, miljørådgjevar Marie Sundheim og ansvarleg for meldingane Kenneth Teigenes. Parelius opplyste at Statnett er eit statleg monopol med ansvar for å byggja, driva og eiga transmisjonsnettet i Norge.

– Vi jobbar ikkje utifrå profitt, vi tenkjer berre samfunnsøkonomi, understreka han.

Den konkrete saka no dreiar seg om den nye linja frå Sogndal via Kollsnes og Mauranger til Sauda. Dagens leidning er frå 1960-talet, og nærmar seg teknisk levetid. I tillegg er kapasiteten ikkje god nok. Ny leidning i Kvinnherad skal takast i bruk i 2031-32.

Marie Sundheim gjekk gjennom dei meldte traséalternativa.

– Vi ynskjer å byggja cirka 80 kilometer med ny leidning i Kvinnherad, avhengig av kva alternativ som blir valt. Typisk høgde for mastene er 25 til 30 meter, sa ho.

Noverande leidning skal rivast når den nye er teken i bruk. Elles skal transformatorstasjonen i Mauranger utvidast, og det skal byggjast ny koplingsstasjon enten på Fureberg eller Ænes. I Indre Matre skal det setjast opp ny transformatorstasjon.

Fordeler og ulemper

Steinar Parelius fekk ordet igjen for å gå nærare inn på kabel i jord eller sjø.

– Kabel er eit tema vi veit mange er opptekne av, konstaterte han.

Han ramsa opp følgjande fordeler og ulemper med kabel:

Fordeler:

* Eliminerer nærføringsulemper.

* Reduserer verknader for natur- og kulturmiljø, friluftsområde og landskapsverdiar.

* Reduserer verknader for jord- og skogbruk.

* Eliminerer kollisjonsrisiko for fugl.

* Kan frigjera areal til andre føremål enn «frakt av straum».

* Sjøkabel har beskjedne verknader for marint miljø.

Ulemper:

* Auka sannsynlegheit for feil.

* Lengre reparasjonstid ved feil.

* Kabeltrasé er eit varig inngrep.

* Stor meirkostnader for samfunnet.

* Lengre anleggsperiode.

* Behov for reaktorar og andre kompenseringsanlegg.

* Lengre trasear.

* Behov for reservar.

– Kabelanlegg har mange negative sider, sa han, og viste eit fotografi frå ein stad der kablar går frå land og ned i sjøen. Biletet viste kolossale sår i landskapet. Han la også til ei anna ulempe, nemleg det høge trykket på djupt vatn.

– Statnett har ansvar for forsyningssikkerheit, det er pri. 1. Alle skal ha lys, 24/7, avslutta Parelius.

Tor Carlsen understreka at NVE ikkje skriv referat frå møtet, så folk må senda innspel for å kunna bli høyrde.

– Dåke har store moglegheiter til å påverka, lokka han.

Grenda kjem attende med eiga sak om dei mange innlegga frå salen.