Stord vil vurdera ny ferjekai likevel

Den nye ordføraren på Stord opnar for å korta ned ferjesambandet mellom Kvinnherad og Stord.

Den nye fleirtalsgrupperinga i Stord kommune består av partia Frp, Høgre, Venstre og KrF. Frp har fått ordføraren i Sigbjørn Framnes, medan Høgre får varaordføraren i Øyvind Kyvik. Fredag la kvartetten fram styringsdokumentet sitt under ein pressekonferanse på Stord hotell. Bladet Sunnhordland rapporterte direkte derifrå.

Under punktet samferdsle skal ordførar Framnes ha vist til debatten i Kvinnherad om innkorting av ferjesambandet til Stord.

«Han opplyser om at han og Kyvik har vore i kontakt med ordførar i Kvinnherad for å ei løysing om ferjestø mellom Djupavik og Klosterneset, for å oppnå forkorting mellom Stord og Kvinnherad», skriv Sunnhordland.

– Skal regionsenteret Leirvik lukkast må vi ha dei andre kommunane med. Då må vi sjå kva dei er opptekne av. I Kvinnherad er det ferjestø. Kan vi sjå kombinasjon med ytre molo og ferjestø, så er dette interessant for oss, utdjupa Sigbjørn Framnes, som la til at han allereie i dag skal i møte med fylkeskommunen.

Må koma no

Grenda har spurd Frp sin frontfigur i Kvinnherad, Ove Lemicka, om han har drøfta saka med partikollegaen på Stord.

– Nei, ikkje no i seinare tid, så dette kjenner eg ikkje til, svarar han.

– Men viss det er sant, kva tenkjer du om det?

– Eg tenkjer det er bra, for dette er noko som må koma no. Stord kommunestyre har dessutan eit ståande vedtak om å vurdera saka. Den sjauen som har vore på Stord korresponderer såleis ikkje med kommunestyret sitt vedtak. Vi veit også at tidlegare ordførar i utgangspunktet var positiv, fortel Lemicka.

Cruisehamn og Sunnfast

Det er også andre ting i styringsplattforma som er relevant for Kvinnherad. Ifølgje Sunnhordland lyder tre av punkta slik:

* Styrka regionsenteret i Leirvik, der ein ser om det kan vera regionale gevinstar inn mot Kvinnherad. Utgreia om ytre molo kan ha andre bruksområde, der satsing på cruisehamn kan styrka samarbeidet mot Kvinnherad og andre nabokommunar.

* Samarbeidspartia skal halda fram arbeidet med å få realisert Huglosambandet tilrettelagt for Sunnfast.

* Støtta opp om arbeidet for å etablera «Nye Sunnhordlandstunet» på Sunnhordland Museum.