Stord con Spirito inviterer til spanande konsert
Sundag 2. juni kjem kvinnekoret Stord con Spirito, under leiing av dirigent Tore Kloster, til Valen kyrkje.
Koret består i alle hovudsak av medlemar frå Stord, men har også fleire medlemar frå både Kvinnherad og Bergen. Konserten har fått tittelen «Verdi med blomar og kvende», eit sitat frå Olav H. Hauge sitt dikt «I dag og i morgon», kjem det fram i ei pressemelding.
– Her formidlar Hauge det intenst vedunderlege i at «eg» lever akkurat no, i alt som er forgjengeleg. I ein liten time med vakker song ynskjer me å ta med publikum inn i ei slik stemning og verd, seier styreleiar i Stord con Spirito Hilde Svalbjørg i pressemeldinga.
Annonse
– Naturen rundt oss og livet sjølv er tema i mange av songane. I tillegg til Olav H. Hauge får vi høyre tonesetjing av lyrikarar som Lord Tennyson, Thomas Moore, Halldis Moren Vesaas og Jakob Sande, fortel ho vidare.
Kvinnhering i hjarte
I den naturlyriske delen av framfører koret også songar av Gustav Holst, i tillegg til folketonar og elles musikk av norske nolevande komponistar som Odd Johan Overøye, Overøye har tonesett Olav H. Hauge sitt dikt «I dag og i morgon».
I programmet presenterer koret også slavisk kyrkjemusikk, og ikkje mindre enn to nydelege Ave Maria, ein av Kjell Mørk Karlsen og ein av Gustav Holst. I tillegg vil det også bli ein sats frå Camille Saint-Saëns sitt Ortorio de Noël, der Yuko Shuto akkompagnerer på piano.
Annonse
– Vår dyktige dirigent vil også bidra på konserten som tenorsolist saman med pianisten Yuko Shuto, som me er så heldige å ha her i Kvinnherad. Dei vil framføra to liedar av Franz Shubert og hans romantiske musikk med tekstar om kjærleik og lengsel, fortel Svalbjørg vidare i pressemeldinga.
Kloster er sjølv busett i Bergen, men er kvinnhering i sitt hjarte, og både resten av koret gler seg til å synga i Valen igjen.
– Me håpar at folk vil bruka ei lita ettermiddagsstund til å senka skuldrene og bli med oss inn i denne fine musikken si verd, seier ho avslutningsvis.
