Stor rasfare i fjellet – noko som merkast i lysløypa
– Unngå alt skredterreng, åtvarar Cato Leganger i Snøskredvarslinga
Publisert
Sist oppdatert
Skredvarslingstenesta varsom.no melder om omfattande ustabile forhold.
– Store og nokre svært store skred kan losna av seg sjølv, åtvarar skredvarslingstenesta.
Annonse
Torsdag kveld var dette tilfelle i lysløypa til Fjellhaugen skisenter.
Espen Berge-Soldal, som er korpsleiar i Kvinnherad Røde Kors Hjelpekorps, åtvarar også mot situasjonen i fjellet no.
– Me ber folk om å tenka seg om før dei legg ut på tur, og kor dei går. Dersom folk vel å legga ut på tur, er det viktig å ha kunnskap om skredfare i tillegg til kunnskap om kameratredning, seier Berge-Soldal og viser til det vesle skredet i Fjellhaugen for å få fram kor ekstremt lett skreda kan losna med tilhøva som er i fjellet no.
– Hald deg unna skredterreng
Annonse
Cato Leganger frå Løfallstrand er snøskredobservatør hjå Snøskredvarslinga. Han er rett nok på Strynefjellet på vidareutdanning innanfor snøskred, og ikkje i Kvinnherad nett no.
– Eg har halde oppsikt med snøen i heile Hardanger gjennom vinteren, og har tre turar i veka i område som Røldal, Fjellhaugen, så eg kjenner forholda relativt godt. Eg har også fått tilsendt bilete, og ser at det har gått ein del skred dei siste dagane. Det vil truleg intensivera seg i dag (fredag) når dagen går, trur Leganger.
Han forklarer stoda ved at den kalde klare perioden ein har vore gjennom utviklar svake lag nede i snødekket, medan kombinasjonen av nedbør og vind, som har prega været dei siste dagane, gir ein enda meir kompleks, og utfordrande situasjon.
– Stigande temperatur gjer at du får ein alvorleg situasjon, som no er på faregrad 4. Då er det berre å halda seg vekke frå skredterreng. I alle fall på fredag. Synkande temperatur og mindre nedbør seint fredag og utover laurdag vil gi lågare skredfare, men det kan framleis vera utfordrande i morgon, laurdag.
Han åtvarar mot at dei skreda som går no kan bli store og svært store.
– Det viktigaste rådet er å halda seg unna alt av skredterreng i dag, men det er ein forseinking i dette, så det er fornuftig å visa aktsemd utover helga også. Varsom.no er beste plassen å halda seg oppdatert på dette om, rår Leganger om.
