Stor publikumpågang for kulturskulen: – Måtte ta grep

Fredag inviterte Kvinnherad kulturskule til danseframsyning i «Blackboxen» i kulturskulebygget på Husnes. Det var ikkje første showet, og blir heller ikkje det siste denne jula.

Danseglade små og store ungar i alderen 6 til 13 år fekk då lovt til å visa dansenummera sine for den fullsette salen, som har plass til 114 tilskodarar.

Dansegruppa 6 til 7 år opna showet med eit julenummer til Rockin around the christmas tree.

Vidare fekk publikum sjå mange spennande koreografiar, til mellom anna songar som Snowman, All I want for christmas og Holly Jolly Christmas.

Men det var også nokre ikkje-julerelaterte dansar som blei vist fram denne kvelden.

Travel lærar

Danselærar Koshiwayi Sabuneti står midt i det som kanskje er den travlaste tida som danselærar.

– Det er mykje som skjer no, og det er ei travel tid. Vi har hatt framsyningar både på Husnes og i Rosendal, og prøver å dela det litt opp etter geografien på dansarane. Vi har hatt nokre reine danseframsyningar, og nokre som har involvert andre fag også, som til dømes med piano og gitar.

Han er glad for at så mange ønsker å støtta og heia på kulturskuleelevane hans.

– Det har blitt litt av eit volum på dansegruppa med tida, og eg tenkjer det er stort at så mange vil koma på showa våre, smiler Koshiwayi, som tross alt er litt klar for juleferie etter ei spesielt travel førjulstid på jobb.

Stor danseglede

Undervisningsinspektør ved Kvinnherad kulturskule, Silje Dyrseth Eide, fortel om stor publikumpågang.

– I fjor blei det så fullt i kinosalen at nokre føresette ikkje fekk plass. Det er veldig synd. Derfor måtte vi ta nokre grep i år, og vi har dermed hatt ein rekke show i år, både på Husnes og i Rosendal, for å dekka behovet, seier Silje.

Ho legg til at spesielt dei yngste ofte stiller med ein heil heiagjeng.

– Då er det besteforeldre, søsken, tanter og onklar som gjerne vil koma og sjå. Koshiwayi har i alt 153 elevar fordelt på 17 grupper. Vi bestemte oss for å dela desse opp i mindre puljer, med ein kombinasjon av yngre og eldre dansarer for at dei minste skulle ha nokon å sjå opp til, fortel undervisningsinspektøren, som legg til at det i år derfor ikkje er nokon føresette eller andre oppmøtte som ikkje har fått plass i publikum.

Med dei eldste

Nytt i år er altså at det ikkje blir eitt stort, felles show for kulturskulen, men at berre dei eldste dansarane skal dansa i kinosalen dette året.

– For nokre av dei yngste, som aldri før har stått på ei scene, kan det verka veldig overveldande å dansa for ein fullsett kinosal. Ved å først ha nokre år i «Blackboxen» får dei sjansen til å bli litt varme i trøya, seier Silje.

Laurdag er det duka for det aller siste juleshowet.

– Kulturskuleelevane har tilgang til gratisbillettar, og eg oppmodar om at føresette tar med seg sine små på show for å sjå på dansarane som er 10-13 år. Det kan vera til stor inspirasjon for dei minste, lokkar ho.