Stor interesse for naturvern
Då Naturvernforbundet i Kvinnherad vart lagt ned i vinter, var det ein liten gjeng som kvar for seg sat og tenkte at det var synd at Kvinnherad mangla nettopp det.
Etter ein liten dytt for å få ballen til å rulla tok dei kontakt med kvarandre for å gjera noko med saka, og dermed var Kvinnherad atter ei gong på veg til å få sitt eige Naturvernforbund.
– Me fekk ei oppmoding frå fleire ulike personar, i tillegg til fylkeslaget, om å starta opp. Så då fekk me fyrst sett saman eit settestyre som fekk jobben med å snakka med folk og koma med forslag til styremedlemar, fortel den nyvalte leiaren Mari Teigen Varanes.
Annonse
Stor interesse
Stiftingsmøte vart haldt 30. august der kring 25 medlemar var med og valte dei fem som skulle sitja i styret.
– Eg var veldig open for at nokon andre kunne få leiarrolla, men når ingen andre ville så blei det slik. Det er jo veldig kjekt også då, og ikkje minst veldig spanande, seier den ferske leiaren.
– Me har derimot ein heilt flat struktur, og eg er utruleg nøgd med styret me har fått. Alle er engasjerte og ein bra gjeng å jobba i lag med. Me kjem til å bli ein høyringspart i saker der me kan uttala oss om ting som handlar om naturvern og inngrep i naturen, fortset Varanes.
Annonse
Resten av styret består av; Nestleiar Aina Solberg, kasserar Gro Sævareid Heien, styremedlem Sigve Solheim og styremedlem Sindre Aksnes.
Under skipingsmøtet vart det også opna opp for at medlemane kunne melda inn saker til det nye forbundet.
– Det kom inn mange saker som folk var interesserte i, så det var veldig kjekt. Folk er så positive og tydelege på at dette er noko dei vil vera med på, fortel Varanes engasjert.
Mange idear
Det fyrste styremøtet skal haldast 20. september, der skal dei setja kursen og finna ut kva dei ynskjer å prioritera.
– Me ynskjer å spreia kunnskap og glede for naturen gjennom ulike arrangement. Me har blant anna snakka om å få til eit kurs i å laga blomeeng, og kanskje få til ein blom- og fuglesongtur til våren. Me har mange idear, lokkar Varanes.
Annonse
– Det er jo så himla mykje fin natur her i Kvinnherad. Det er eit stort ansvar, både i høve dei som kjem etter oss, men også dei som lever i og av naturen. Det er utruleg mange artar som står i fare for å bli utrydda, samtidig er det mykje me kan gjera her lokalt. Då er det heilt avgjerande at fleire vil ta vare på naturen, fortset den engasjerte leiaren.
Varanes fortel at det er veldig gjevande å jobba med og ho håpar at fleire blir med.
– Det er eit stort press på naturen frå fleire hald, og nedbygging bit for bit er ein reell fare dersom me ikkje passar på. Me ynskjer gjerne fleire med på laget som kan bli med og støtta opp om naturvernet i Kvinnherad, avsluttar Varanes.
