Stor interesse for hotelldirektørjobb: – Mange lokale søkjarar

Måndag gjekk søknadsfristen til den utlyste stillinga som hotelldirektør ved Rosendal Fjordhotel ut. Og dei nye hotelleigarane, som kjøpte hotellet rundt nyttår, fortel at det har vore stor interesse for jobben.

– Vi har fått inn veldig mange søkjarar frå heile landet, og starta opp med første intervjurunde etter fristen gjekk ut måndag. Så køyrer vi vidare utover tysdagen. Vi gjer grovsorteringa no i fyrste runde, så vil vi gå over i ein andre intervjurunde etter det. Den har vi planlagt å ha fysisk på hotellet, seier eigedomsdirektør Ole Kristian Johannessen i West Coast Invest til Grenda.

Har selt Rosendal Fjordhotel

– Kjekt med lokale

Då vi snakka med Johannessen tysdag ettermiddag hadde han fem minutt ledig mellom dei mange intervjurundane på Teams.

– Vi er veldig nøgde med søkjarlista. Det er mange som er interessert i jobben, og det er ein god miks både i alder og kjønn. Vi har både unge og godt vaksne, så vi har litt å velja i, seier Johannessen.

Han fortel at det er søkjarar frå nord, sør, vest og aust i landet. Mange av dei er også frå Kvinnherad.

– Det som er ekstra kjekt er at vi registrerer at det har skapt ei veldig interesse i lokalsamfunnet. Det er veldig mange lokale som har søkt på jobben, seier han og held fram:

– Det er mange som ser på hotellet som ei hjørnesteinsbedrift og eit landemerke i kommunen. Vi ser heller ikkje vekk i frå at det at vi har kome inn på eigarsida med eit ynskje om å løfta og utvikla hotellet vidare, har gjort det ekstra interessant å søkja.

Utvikling

Utvikling var også eit ord som gjekk igjen i stillingsannonsen. West Coast Invest er nemleg på jakt etter ein hotelldirektør som kan vera med på å utvikla hotellet vidare.

– Vi er veldig positive til alle bidrag som måtte koma, og om bidraga er gode nok så skal det ikkje stå på midlane til å gjennomføra dei. Vi vil utvikla hotellet vidare, men samtidig ta vare på den gode kjernen og dei tradisjonane som er der. Dette skal ikkje bli noko kjedehotell med sjølvbetjening og slikt. Det skal vera eit hotell i god tradisjon, men samtidig med utvikling, sluttar han.