Stor etterspurnad etter ved

– Eg dreiv på med sal av ved for 6-7 år sidan. Då fekk eg 750 kroner pallen, om veden var lødd og tørr, men då måtte det køyrast fram til kunden. No er marknaden ein heilt annan, meiner Alexander Johnsen.

26-åringen frå Halsnøy ser pallar med våt ved gå for 1000 kroner no, men reknar med at palleprisen på tørr ved ser 1500-talet til hausten.

– Når bensinstasjonane fyller opp med ved utanfor inngangane sine i staden for grillkol, så seier det mykje om korleis det er for folk flest om dagen, meiner han.

Tre-fire ledd

– Nokon skal ha småsekkar, andre skal ha store. Å bli kvitt veden blir ikkje noko problem, trur Alexander.

Han og kompisen Isak Mehammer (26) fekk lov av kommunen å ta ned noko av skogen ved industriområdet på Bjoaneset, nær området til Hordaland Betongsaging, der Johnsen jobbar.

– Så lenge me rydda opp etter oss, fekk me lov til det, var meldinga.

Isak hadde gravemaskin, og så har dei kjøpt seg ein gammal traktor til å køyra vedkløyvaren med.

– Utan tilgang til desse maskinane, så hadde me ikkje kunna gjort dette så effektivt at me fekk litt volum på det, vurderer Johnsen og Mehammer.

Veden har seinare blitt kløyvd ute hos ein bonde, før det har blitt køyrt til tørkestaden.

– Me har operert i tre-fire ledd. Saga ein plass, kløyvd ein annan, lødd ein tredje stad og tørka ein fjerde, forklarer dei.

På Landa får dei tørka veden på det Johnsen og Mehammer meiner er beste mogelege viset, med god klaring til taket og ditto gjennomtrekk.

Hobby

Noko som karane ikkje hadde opplevd før i år, var å selja våt ved til kundane.

– Det som er her no er no i ferd med å tørka, men i vår kløyvde me rett i hengjar og køyrde me heim i tunet til ein kunde, som var svært nøgd med å sikra seg ved. Løinga tok dei sjølve. Tidlegare har det vore ferdig lødd og klar ved som har vore omsett, forklarer Isak og Alexander.

Karane har det som ein hobby og sidejobb gjennom enkeltmannsføretaket til Isak.

– Det noko me har å tutla på med i helgane. Me har kløyvd 20 kubikk med ved på fire timar ein laurdag. Då skal det jo løast etterpå, så det går noko tid i det, vurderer Isak og Alexander.

– Dette hadde ikkje gått utan desse ulike tenestene me har fått her og der. Ein kan ikkje ha 40 kubikk med ved ståande til tørking i tunet, eksemplifiserer Alexander.

Dei har aldri før høyrt om så stor etterspurnad etter ved så tidleg som i år.

– Blir me kvitt alt dette, så går me kanskje i gang med det endå ein gong, sluttar kompisane.